स्थानिक स्वराज्य संस्थांच्या निवडणुकीचे पडघम वाजले असून राज्यभरात पक्ष प्रवेशाचा जोरदार धडाका सुरू आहे. अशातच चिखलदराचे माजी नगराध्यक्ष राजेंद्र सिंह सोमवंशी यांनी आज अचानक भाजपचा झेंडा हाती घेतल्याने राष्ट्रवादी अजित पवार गटाला मोठा धक्का बसला आहे. अचानक झालेल्या या पक्षप्रवेशामुळे राजकीय शहरातील राजकीय वर्तुळात मोठी खळबळ उडाली आहे.

अमरावतीतील अजित पवार गटाचे विधान परिषदेचे आमदार संजय खोडके यांचे कट्टर समर्थक राजेंद्रसिंग सोमवंशी, आल्हाद कालोटी आणि चिखलदरा नगर परिषदेतील सलग वीस वर्षे नगरसेवक राहिलेले राजेश मंगलेकर यांच्यासह भाजपचे तसेच राष्ट्रवादी काँग्रेस अजित पवार गटाचे अनेक कार्यकर्ते भाजप नेत्या व माजी खासदार नवनीत राणा यांच्या अमरावतीतील गंगा सावित्री निवासस्थानी भाजपमध्ये सामील झाले.

यावेळी युवा स्वाभिमान पार्टीचे बडनेरा विधानसभा आमदार रवी राणा यांनी राजेंद्र सिंग सोमवंशी यांचे स्वागत केले. त्यामुळे आगामी निवडणुकीच्या तोंडावर राष्ट्रवादी काँग्रेस अजित पवार गटाला अमरावतीमध्ये मोठा झटका बसला आहे.

राजेंद्रसिंग सोमवंशी यांनी चिखलदरा नगरपरिषदेचे माजी नगराध्यक्ष म्हणून नेतृत्व केले आहे. त्यांच्या पत्नी देखील विजया राजेंद्र सिंग सोमवंशी या देखील नगराध्यक्ष होत्या. राजेंद्र सोमवंशी यांना चिखलदरा नगरपरिषद नगराध्यक्षपदाची भाजपाने जाहीर केली आहे.