ओंकार कदम, साम टीव्ही, प्रतिनिधी

Maharashtra : राज्यातील सातारा जिल्ह्यात महायुतीमध्ये दरार पडत असल्याचे पाहायला मिळत आहे. ग्रामविकास मंत्री जयकुमार गोरे आणि मदत व पुनर्वसन मंत्री मकरंद पाटील यांच्यात खडाजंगी सुरु आहे. दोघांनी एकमेकांच्या मतदार संघात राजकीय कार्यक्रम घ्यायला सुरुवात केल्याने राष्ट्रवादी काँग्रेस अजित पवार गट आणि भारतीय जनता पक्ष यांच्या शीतयुद्धाची चर्चा रंगू लागली आहे.

काही दिवसांपूर्वी मंत्री जयकुमार गोरे यांनी मकरंद पाटील यांच्या वाई मतदारसंघातील बावधनमध्ये एका कार्यक्रमात उपस्थिती लावली होती. त्यांनी मंत्री मकरंद पाटील यांचे नाव न घेता टीका केली होती. कोणीही बाभळीच्या झाडाखाली उभे राहत नाही. त्याला आंब्याची सावली लागते. बावधन गावाची ताकद राजकारण बदलवण्याची आहे आजची सभा परिवर्तनाची, असे म्हणत गोरे यांनी मकरंद पाटलांना डिवचले होते.

या घडामोडीनंतर अजित पवार यांच्या राष्ट्रवादीचे मंत्री मकरंद पाटील यांनी देखील उद्या मंत्री जयकुमार गोरे यांच्या मतदारसंघात उपमुख्यमंत्री अजित पवार यांच्या उपस्थितीत पक्षप्रवेशाचा कार्यक्रम घेतल्यामुळे महायुतीमध्ये ठिणगी पडल्याची चर्चा सुरू आहे. या कार्यक्रमाविषयी विचारल्यावर मकरंद पाटील यांनी जयकुमार गोरे हे त्यांचा पक्ष वाढवत आहेत, मी माझा पक्ष वाढवतोय, असे वक्तव्य केले.

वाईचे मतदार मला नेहमीच वाढीव मताधिक्याने मतदान करत असतात. मी दोन, तीन हजाराने निवडून आलो नाही, असा टोला मंत्री मकरंद पाटील यांनी जयकुमार गोरे यांचे नाव न घेता लगावला. या एकूणच परिस्थितीमुळे सातारा जिल्ह्यामध्ये महायुतीमध्ये खडाजंगी सुरु असल्याचे म्हटले जात आहे. हे शीतयुद्ध लवकरच थांबेल की वाढेल याकडे सर्वांचे लक्ष लागले आहे.