Maharashtra NCP Crisis: अजित पवार यांच्या बंडानंतर राष्ट्रवादीमध्ये मोठी फूट पडली. अजित पवार यांच्यासह ४० आमदारांनी शिंदे फडणवीस सरकारमध्ये प्रवेश केल्याने राजकीय वर्तुळात एकच खळबळ उडाल्याचे पाहायला मिळाले.

या बंडखोरीनंतर शिवसेने प्रमाणेच अजित पवार गट आणि शरद पवार गट असे दोन गट राष्ट्रवादीमध्येही पडल्याचे चित्र दिसत आहे. मात्र या बंडखोरी नंतरही अजित पवार यांच्या मंत्रालयाच्या दालनातील शरद पवार यांच्या फोटोने लक्ष वेधले आहे.

याबाबत अधिक माहिती अशी की, राज्यातील खाते वाटपाचा तिढा अखेर आज सुटला असून अजित पवार (Ajit Pawar) यांच्यासह त्यांच्यासोबत शपथविधी घेतलेल्या ९ मंत्र्यांना खातेवाटप करण्यात आले. उपमुख्यमंत्री अजित पवार यांच्याकडे राज्याच्या वित्त आणि नियोजन विभागाच्या मंत्रिपदाची जबाबदारी देण्यात आली आहे. 

पदभार स्विकारल्यानंतर सध्या अजित पवार यांच्यासाठी नव्याने तयार करण्यात आलेल्या दालनाचा व्हिडिओ सध्या सोशल मीडियावर व्हायरल झाला आहे. ज्यामध्ये लावलेल्या शरद पवार (Sharad Pawar) यांच्या फोटोने सर्वांचेच लक्ष वेधले.

शरद पवार यांनी फोटो न वापरण्याचा दिला होता आदेश?

दरम्यान, अजित पवार यांच्या बंडानंतर शरद पवार यांनी त्यांचे फोटो न वापरण्याचे आदेश अजित पवार गटाला दिले होते. परंतु अजित पवार यांनी मात्र त्यांच्या कार्यकर्त्यांना शरद पवार यांचे फोटो वापरण्याच्या सुचना दिल्या होत्या. त्यामुळे पक्षाच्या (NCP) मालकीचा वाद सुरू असतानाही अजित पवार यांच्या दालनात शरद पवार यांचा फोटो लागल्याने राजकीय वर्तुळात चर्चा रंगल्या आहेत. (Latest Marathi News)