वैदेही कानेकर, साम प्रतिनिधी

राज्यातील शेतकऱ्यांनंतर सरकारनं अंगणवाडी सेविका आणि मदतनीसांसाठी दिवाळीच्या पार्श्वभूमीवर महत्त्वाची घोषणा केलीय. सरकारनं अंगणवाडी सेविका व मदतनीसांना भाऊबीज भेट दिली आहे. राज्य सरकारकडून अंगणवाडी सेविकांसाठी प्रत्येकी २ हजार रुपये भाऊबीजची भेट म्हणून दिले जाणार आहेत. अंगणवाडी सेविकांच्या पर्यवेक्षिका पदावर पदोन्नतीच्या वयोमर्यादा वाढवण्याचा निर्णयानंतर सरकारनं घेतलेल्या या निर्यणामुळे अंगणवाडी सेविकांमध्ये आनंदाचं वातावरण आहे.

या निर्णयाचा राज्यातील एकूण २ लाख १४ हजार ९७ अंगणवाडी कर्मचाऱ्यांना लाभ मिळणार आहे. महिला व बालविकास मंत्री आदिती तटकरे यांनी याबाबत माहिती दिली. या योजनेसाठी शासनाकडून एकूण ४२ कोटी ८१ लाख ९४ हजार रुपयांचा निधी उपलब्ध करून देण्यात आलाय. दिवाळीपूर्वीच संबंधित कर्मचाऱ्यांना ही रक्कम देण्यात येणार असल्याचे त्यांनी सांगितलंय.

अंगणवाडी सेविका आणि मदतनीस या महिला व बालविकास विभागाच्या माध्यमातून बालकांचे पोषण, आरोग्यविषयक जनजागृती आणि विविध शासकीय योजनांची अंमलबजावणी यांसारखी महत्त्वाची कामे करतात. राज्य सरकारकडून यंदाही अंगणवाडी सेविका आणि मदतनीस यांना दिवाळी भाऊबीज भेट दिली जाणार आहे. मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री सुनेत्रा अजित पवार यांच्या मार्गदर्शनाखाली भाऊबीजचं गिफ्ट देण्याचा निर्णय घेण्यात आला आहे.

राज्यातील गर्भवती महिला, स्तनदा माता आणि बालकांच्या पोषणाची काळजी घेणाऱ्या अंगणवाडी सेविका व मदतनीस यांची दिवाळी गोड व्हावी, हा या निर्णयामागील उद्देश असल्याचं मंत्री आदिती तटकरे यांनी यावेळी सांगितले.