Maharashtra MLC election news : महाराष्ट्रात पुन्हा एकदा निवडणुकीचा धुरळा उडणार आहे. होय, विधान परिषदेच्या १७ स्थानिक स्वराज्य संस्था मतदारसंघांतील जागांसाठी लवकरच निवडणूक होण्याची शक्यता आहे. जिल्हा परिषदांच्या निवडणुका प्रलंबित असल्या तरी, नियमानुसार या प्रक्रियेत कुठलाही अडसर येणार नसल्याचं स्पष्ट झालं आहे. त्यामुले पुढील १० ते १२ दिवसांत या निवडणुकीची घोषणा होऊ शकते, असे सांगण्यात येत आहे.

गेल्या दोन-अडीच वर्षांपासून या १७ जागा रिक्त होत्या. तसेच, विधानसभेतून निवडून द्यायच्या 9 जागांसाठीही येत्या काही दिवसांत निवडणूक जाहीर होऊ शकते. यामुळे राज्यातील राजकीय हालचालींना वेग आलाय. महायुती आणि महाविकास आघाडीत जागांसाठी रस्सीखेच पाहायला मिळणारेय. राज्यात पुन्हा एकदा निवडणुकीचा धुरळा उडणार आहे. या १७ जागांवर कोण बाजी मारणार? याकडे राज्याचे लक्ष लागलेय.

स्थानिक स्वराज्य संस्थांच्या निवडणुका झाल्याने विधान परिषदेच्या १७ जागा भरण्यासाठी हालचाली सुरू झाल्या आहेत. १७ मतदारसंघातील निवडणुकी संदर्भातला अहवाल लवकर केंद्रीय निवडणूक आयोगाकडे पाठवला जाणार असल्याची माहिती मिळाली आहे. २० जिल्हा परिषदाची निवडणूक बाकी असली तरी परिषदेच्या १७ जागांची निवडणूक होणार असल्याचे सूत्रांनी सांगितले आहे.

या मतदारसंघात होऊ शकते निवडणूक

सोलापूर, अहिल्यानगर, ठाणे, जळगाव, सांगली-सातारा, नांदेड, यवतमाळ, पुणे, भंडारा-गोंदिया, रायगड-रत्नागिरी-सिंधुदुर्ग ल, नाशिक, वर्धा-चंद्रपूर-गडचिरोली, अमरावती, धाराशिव-लातूर-बीड, परभणी-हिंगोली, छत्रपती संभाजी नगर-जालना, नागपूर

विधान परिषदेच्या ९ जागांसाठी निवडणूक -

उद्धव ठाकरेंसह विधान परिषदेच्या ९ आमदारांचा कार्यकाळ लवकरच संपणार आहे. या ९ जागांसाठी पुढील आठवड्यात निवडणूक जाहीर होण्याची शक्यता वर्तवण्यात येत आहे. विधान परिषदेच्या ९ सदस्यांचा कार्यकाळ १३ मे रोजी संपुष्टात येणार आहे. भाजपच्या वाट्याला ५, शिवसेना २, राष्ट्रवादी १ आणि महाविकास आघाडी १, विधानसभेतील संख्याबळानुसार चित्र आहे. राष्ट्रवादीकडे अतिरिक्त १३ मतं, अशात महायुतीने आणखी उमेदवार देण्याचे ठरवल्यास निवडणूक बिनविरोध होण्याची शक्यता कमी असल्याचे सांगण्यात येत आहे.