जालना: महाराष्ट्र विधिमंडळ अंदाज समिती विविध विभागांच्या विकास कामांच्या तपासणीसाठी येत्या दोन ते चार डिसेंबर जालना जिल्ह्याच्या (Jalna District) दौऱ्यावर येत आहे. महसूल, वन, मदत आणि पुर्नवसन, अन्न व नागरी पुरवठा, ग्राहक संरक्षण, औषधी, उद्योग, उर्जा, कामगार, पर्यावरण, वातावरणातील बदल, सार्वजनिक बांधकाम, आदिवासी, नगर परिषद, जलसंपदा, कृषी, मत्स्य व्यवसाय, ग्रामविकास, गृह, सार्वजनिक आरोग्य, कुटुंब कल्याण, पाणी पुरवठा व स्वच्छता या सगळ्या विभागाच्या विविध विकास कामांची प्रत्यक्ष पाहणी (inspection) ही समिती  करणार आहे. (Maharashtra Legislative Committee visits Jalna; Direct inspection of development works)

हे देखील पहा -

आ. रणजीत कांबळे यांच्या अध्यक्षतेखालील या समितीत विधानसभा व विधान परिषदेचे एकूण  तीस आमदार सदस्य आहेत आणि विविध खात्याचे अठ्ठावीस सचिव समितीच्या सोबत असणार आहे. अंदाज समितीच्या दौर्‍याचा कार्यक्रम जिल्हा प्रशासनाला कळवण्यात आला असून गुरूवार, दोन डिसेंबर रोजी सकाळपासून विविध विकास कामांच्या तपासणीचे काम सुरू होईल यात प्रामुख्याने महसूल, अन्न नागरी पुरवठा, औषधी विभागाच्या कार्यालयास व प्रकल्पास भेटी दिल्या जाणार आहेत.

शुक्रवार तीन डिसेंबर रोजी जालना, अंबड, बदनापूर, जाफ्राबाद आणि घनसावंगी नगर परिषद व नगर पंचायतीच्या कामांची पाहणी करण्यात येणार आहे. तर शनिवार चार डिसेंबर रोजी परतूर व मंठा तालुक्यातील जलसंपदा, नगर परिषद, पाणी पुरवठा व स्वच्छता या विभागातील कामाला समिती भेट देणार आहे. जिल्हाधिकारी कार्यालयात सध्या या सगळ्या पार्श्वभूमीवर बैठकांचे सत्र सुरू झाले आहे. सोमवारी दिवसभर विविध विभागांच्या प्रमुख अधिकाऱ्यांसमवेत जिल्हाधिकारी डॉ. विजय राठोड यांनी विकासाच्या कामांचा आढावा घेतला.

अंदाज समितीच्या दौर्‍याच्या पूर्वतयारीसाठी काही अधिकाऱ्यांना विशेष जबाबदारी देण्यात आली आहे. कोणती विकास कामे समितीच्या सदस्यांना दाखवायची या सगळ्या संदर्भात चर्चा करण्यात आली. सर्व विभागाच्या अधिकाऱ्यांना जय्यत तयारी करण्याचे आदेश जिल्हाधिकार्‍यांनी दिले आहेत.

Edited By - Akshay Baisane