तळीरामांनो विकेंडनिमित्त पार्टी करण्याचा विचार करत असाल तर, ही बातमी तुमच्यासाठी. शनिवारी, २५ जुलै रोजी संपूर्ण महाराष्ट्रात आषाढी एकादशीनिमित्त ड्राय डे जाहीर करण्यात आला आहे. त्यामुळे राज्यभरातील दारूची सर्व दुकाने, बार, पब दिवसभर बंद राहणार आहेत. त्यामुळे आठवड्याच्या शेवटी बाहेर जाण्याचा किंवा मित्र-परिवारासोबत पार्टीचा बेत आखण्याआधी हे नक्की लक्षात ठेवा.

महाराष्ट्रातील सर्वात महत्त्वाच्या धार्मिक सणांपैकी एक असलेल्या आषाढी एकादशीला लाखो भाविक भगवान विठ्ठलाच्या दर्शनासाठी पंढरपूरमध्ये दाखल होतात. राज्यभरात मंदिरांमध्ये विशेष पूजा, भजन, कीर्तन आणि धार्मिक कार्यक्रमांचे आयोजन केले जाते. या पार्श्वभूमीवर कायदा व सुव्यवस्था राखण्यासाठी तसेच धार्मिक वातावरणाला गालबोट लागू नये यासाठी राज्य सरकारकडून ड्राय डे लागू केला आहे.

हिंदू पंचांगानुसार, यंदा एकादशी तिथीची सुरुवात २४ जुलै २०२६ रोजी सकाळी ९.१२ वाजता होईल आणि तिची समाप्ती २५ जुलै रोजी सकाळी ११.३४ वाजता होईल. एकादशी तिथी २५ जुलैच्या सूर्योदयाच्या वेळी अस्तित्वात असल्याने याच दिवशी देशभरातील भाविक उपवास आणि धार्मिक विधी करतील.

आषाढी एकादशीला महाराष्ट्रात विशेष धार्मिक आणि सांस्कृतिक महत्त्व आहे. या दिवशी अनेक जण उपवास करतात, भगवान विठ्ठलाची पूजा करतात, तुळशीची पाने अर्पण करतात तसेच विष्णू सहस्रनाम, हरिपाठ आणि धार्मिक ग्रंथांचे वाचन करतात. याच दिवसापासून चातुर्मास या चार महिन्यांच्या पवित्र कालखंडालाही सुरुवात होते.