अभिजीत सोनावणे, साम टीव्ही, प्रतिनिधी

CM Devendra Fadnavis : राज्यभरात निलेश घायवळ प्रकरणाची चर्चा सुरु आहे. पुण्यातील कुख्यात गुंड निलेश घायवळ लंडनला पळून गेला आहे. गुन्हेगारी इतिहास असताना त्याला पासपोर्ट कसा मिळाला? तो पळून कसा गेला याचा तपास सुरु आहे. या एकूणच प्रकरणावरुन राजकारण तापले आहे. अशातच निलेश घायवळ यांचा भाऊ सचिन घायवळला शस्त्र परवाना गृहराज्यमंत्री योगेश कदम यांच्या सहीनंतर देण्यात आल्याची चर्चा सुरु आहे. यावरुन अनिल परब यांनी कदम यांच्यावरही टिका केली आहे. या घायवळ प्रकरणावर मुख्यमंत्री देवेंद्र फडणवीस यांनी भाष्य केले आहे.

मुख्यमंत्री देवेंद्र फडणवीस हे नाशिक दौऱ्यावर आहेत. या दौऱ्यादरम्यान त्यांनी पत्रकार परिषद घेतली. पत्रकार परिषदेमध्ये त्यांनी नाशिकमधील वाढत्या गुन्हेगारीवर प्रतिक्रिया दिली. या व्यतिरिक्त निलेश घायवळ प्रकरण, पोलिसांकडून करण्यात आलेली कारवाई, युती म्हणून निवडणूका लढणार की स्वतंत्रपणे लढत पाहायला मिळणार अशा अनेक गोष्टींवर भाष्य केले.

पत्रकार परिषदेत देवेंद्र फडणवीस यांनी 'निश्चितपणे मी स्वतः पोलीस आयुक्तांना पूर्ण मोकळीक दिली आहे. अतिशय चांगल्या पद्दतीने काम चाललं आहे. भाजपचा असो की कोणत्याही पक्षाचा असो, कोणालाही सोडू नका, असे पूर्ण अधिकार पोलीस आयुक्तांना दिले आहेत. ही गुन्हेगारी आहे, काही लोक राजाश्रय देण्याचा प्रयत्न करतात, तर अशा सगळ्या गोष्टींना मोडून काढण्याचा निर्णय़ घेतला आहे. कुणाचा काही पास्ट असो आणि आता कुणी गुन्हेगारीत जात असेल तर त्याला सोडणार नाही', असे वक्तव्य केले.

निलेश घायवळ प्रकरणावर बोलताना मुख्यमंत्री फडणवीस म्हणाले, 'शस्त्र परवाना संबंधित एक सुनावणी गृह राज्यमंत्री यांनी घेतली होती. पण त्यांनी परवाना दिलेला नाही. त्यांनी परवाना दिला असता, तर कदाचित त्यांच्यावर आरोप योग्य होता. पण त्यांनी परवाना दिलेलाच नाही.' एका बाजूला मुख्यमंत्री या प्रकरणावर भाष्य करत असताना दुसऱ्या बाजूला निलेश घायवळ प्रकरणात मोठी अपडेट समोर आली.

निलेश घायवळ प्रकरण आता गुन्हे शाखेकडे वर्ग करण्यात आले आहे. या प्रकरणाचा तपास पुणे पोलिसांच्या गुन्हे शाखेकडे सोपवण्यात आला आहे. पुणे पोलीस आयुक्त अमितेश कुमार यांनी यासंबंधित आदेश जारी केले आहेत. २०२१ मध्ये सुद्धा घायवळवर दाखल असलेल्या गुन्ह्याचा तपास गुन्हे शाखेकडे होते. घायवळवर ३० दिवसांच्या आत ५ गुन्हे दाखल करण्यात आले आहेत. त्याच्यावर मकोका अंतर्गत गुन्हा दाखल करण्यात आला आहे. कारवाईपूर्वीच तो लंडनला पळून गेला.