राज्यातील वाहतूक व्यवस्था अधिक जलद करण्याच्या दृष्टीने शासनाने महत्त्वाचे पाऊल उचलले आहे. नागपूर आणि मुंबईतील दोन मोठ्या पायाभूत प्रकल्पांना मंजुरी दिली आहे. मुख्यमंत्री देवेंद्र फडणवीस यांच्या अध्यक्षतेखाली झालेल्या बैठकीत नागपूर मेट्रो रेल टप्पा-२ अंतर्गत कन्हान नदी ते कन्हान शहर या दरम्यान मेट्रो मार्गिका उभारण्यासाठी, तसेच मुंबईतील स्वातंत्र्यवीर सावरकर सागरी सेतूला वांद्रे किल्ल्याशी जोडणाऱ्या कनेक्टर प्रकल्पाला मान्यता देण्यात आली.

मुंबईतील स्वातंत्र्यवीर सावरकर सागरी सेतूपासून वांद्रे किल्ल्यापर्यंत सुमारे ३.५५ किलोमीटर लांबीचा अतिरिक्त जोडरस्ता उभारण्यात येणार आहे. या महत्त्वाकांक्षी प्रकल्पासाठी १,७२२.४० कोटी रुपयांचा खर्च अपेक्षित असून महाराष्ट्र राज्य रस्ते विकास महामंडळामार्फत (MSRDC) त्याची अंमलबजावणी करण्यात येणार आहे. या कनेक्टरमुळे सध्या २० ते ४५ मिनिटे लागणारा प्रवास अवघ्या १० मिनिटांपर्यंत कमी होणार असल्याने मुंबईकरांना मोठा दिलासा मिळणार आहे. तसेच वाहतूक कोंडी कमी होण्यासही मदत होणार आहे.

दुसरीकडे, नागपूर जिल्ह्यातील कन्हान परिसरातील सार्वजनिक वाहतूक सुविधा अधिक मजबूत करण्यासाठी नागपूर मेट्रो रेल टप्पा-२ अंतर्गत कन्हान नदी ते कन्हान शहर या दरम्यान १.४० किलोमीटर लांबीची उन्नत मेट्रो मार्गिका उभारण्यात येणार आहे. या मार्गिकेवर एक मेट्रो स्थानक प्रस्तावित असून प्रकल्पाची एकूण किंमत ३१०.३५ कोटी रुपये आहे. या प्रकल्पाची अंमलबजावणी महाराष्ट्र मेट्रो रेल कॉर्पोरेशन लिमिटेड (महामेट्रो) मार्फत केली जाणार आहे.

दरम्यान, या मेट्रो विस्तार प्रकल्पाला केंद्र शासनाची अंतिम मान्यता मिळाल्यानंतर प्रत्यक्ष कामाला सुरुवात होणार आहे. या दोन्ही प्रकल्पांमुळे राज्यातील वाहतूक पायाभूत सुविधा अधिक मजबूत होऊन नागरिकांचा प्रवास अधिक वेगवान, सुरक्षित आणि सोयीस्कर होण्याची अपेक्षा व्यक्त केली जात आहे.