विनोद जिरे, बीड

विधानसभा निवडणुकीच्या पार्श्वभूमीवर राज्यातील राजकीय वातावरण चांगलेच तापले आहे. बीडमध्ये काका-पुतण्या पुन्हा आमने-सामने आले आहेत. जयदत्त क्षीरसागर आणि संदीप क्षीरसागर एकमेकांवर टीका करत आहेत. काका जयदत्त क्षीरसागर यांच्या टीकेला पुतण्या आमदार संदीप यांनी पलटवार केला आहे. जयदत्त क्षीरसागर यांच्या टीकेला निकालाच्या माध्यमातून उत्तर देणार असं वक्तव्य संदीप क्षीरसागर यांनी केले आहे.

बीड विधानसभा मतदारसंघातील टोल बंद करायचा असेल, गुटखा, वाळू बंद करायची असेल, तर या ठिकाणी परिवर्तन झालं पाहिजे. असं टीकास्त्र डागद माजी मंत्री जयदत्त क्षीरसागर यांनी कार्यकर्त्यांच्या आग्रहाखातर आपण बीड विधानसभेसाठी अपक्ष निवडणूक लढवणार आहोत, असं जाहीर केलं. काकाच्या या टीकेला आता संदीप क्षीरसागर यांनी उत्तर दिले आहे. २०१९ ला जसं जनतेच्या आशीर्वादाने त्यांना उत्तर दिलं होतं त्याच पद्धतीने या वेळेस देखील या टीका करणाऱ्यांना जनतेच्या आशीर्वादाने निकालातून उत्तर देणार आहे, असा फलटवार आमदार संदीप क्षीरसागर यांनी काका जयदत्त क्षीरसागर यांच्यावर केला आहे..

आज राष्ट्रवादी काँग्रेस शरद पवार गटाचे उमेदवार संदीप क्षीरसागर उमेदवारी अर्ज दाखल करत आहेत. त्यांनी बीडच्या लवकर राजुरी येथील ग्रामदैवत असणाऱ्या नवगण गणपती बाप्पाचे दर्शन घेतले आहे. त्यानंतर ते आपल्या आई क्षीरसागर यांच्या समाधीस्थळी नतमस्तक झाले असून आता ते उमेदवारी अर्ज दाखल करणार आहेत. दरम्यान उमेदवारी अर्ज दाखल करण्यापूर्वी आमदार संदीप क्षीरसागर यांनी काका जयदत्त क्षीरसागर याच्यावर टीका केली आहे.