पालघर: राज्यातील अनेक जिल्ह्यात जनावरांना लम्पी आजाराची (Lumpy Skin Disease) लागण होत आहे. पालघर (Palghar) जिल्ह्यातील वाडा तालुक्यातही लम्पी आजाराचा शिरकाव झाला आहे. पालघर जिल्ह्यातील वाडा तालुक्याच्या (Wada) कोंढले या गावात एका पशुला लम्पीची लागण झाल्याचं उघड झालं आहे. ही बाब लक्षात आल्यानंतर जिल्हा प्रशासनाने तातडीने उपाययोजना सुरु केल्या आहेत. (Lumpy Skin Disease News)

जनावरांना लम्पी आजाराची लागण झाल्यानंतर पशु मालकांनी काय काळजी घ्यावी याबाबत प्रशानाकडून मार्गदर्शन करण्यात येत आहे. तसेच कोंढले गावाच्या परिसरातील पाच किलोमीटरच्या आवारात जनावरांचे लसीकरण करण्यात येत आहे, सोबतच जनजागृतीलाही सुरुवात केली आहे. पशुंच्या जवळ स्वच्छता ठेवावी तसेच इतर मार्गदर्शन पशु मालकांना पशुसंवर्धन अधिकाऱ्यांकडून करण्यात आले आहेत. (Palghar Latest News)

गुजरातमध्ये लिंपी आजाराचे प्रमाण जास्त आहे, त्यात पालघर जिल्हा हा गुजरात आणि महाराष्ट्राच्या सीमेवर आहे. त्यामुळे गुजरातमधून येणाऱ्या पशुवर प्रशासनाने बंदी घातली आहे. जिल्ह्यातील तीन चेक पोस्टवर तपासणीसाठी पालघर पशुसंवर्धन विभागाच्या टीम तैनात केल्या गेल्या आहेत. या चेक पोस्टवर महाराष्ट्रात येणाऱ्या सर्व पशुंची तपासणी केली जाणार आहे.

लम्पी त्वचा रोगाची लक्षणे?

लम्पी त्वचा रोगाच्या लक्षणांमध्ये ताप, डोळे आणि नाकातून स्त्राव, जास्त लाळ, पशुंच्या शरीरावर फोड येणे आणि दुधाचे उत्पादन कमी होणे अशी लक्षणे दिसून येतात. काही प्रकरणांमध्ये गुरांना खाण्यास त्रास होत असल्याचेही निदर्शनास आले आहे.

Edited By - Akshay Baisane