Lonavala News: पवना धरण परिसरात फिरायला आलेल्या मुंबईच्या (Mumbai) तरुणाचा बुडून मृत्यू झाल्याची दुर्देवी घटना समोर आली आहे. साहिल विजय सावंत असे मृत्यू झालेल्या तरुणाचे नाव आहे. या घटनेची माहिती मिळताच लोणावळा ग्रामीण पोलिसांनी घटनास्थळी धाव घेत युवकाचा मृतदेह पाण्यातून बाहेर काढण्याच्या कार्यास सुरूवात केली आहे. या दुर्देवी घटनेने परिसरात खळबळ उडाली आहे. (Latest Marathi News)

याबाबत अधिक माहिती अशी की, मुंबईतील एकाच कॉलनीमध्ये राहणाऱ्या नऊ तरुण आणि नऊ तरुणींचा ग्रुप लोणावळा (Lonavala) परिसरात फिरण्यासाठी आला होता. लोणावळा परिसर फिरून झाल्यांनतर ते पवना धरण (Pavana Dam) परिसर फिरण्यासाठी आले. यावेळी पवना धरणाच्या पाण्यात हे तरुण पोहण्यासाठी उतरले. मात्र या ग्रूपमधील साहिल सावंत याला पाण्याचा अंदाज न आल्याने तो धरणात बुडाला. ज्यामध्ये त्याचा दुर्दैवी मृत्यू झाला.

दरम्यान, याबाबतची माहिती मिळताच घटनास्थळी लोणावळा ग्रामीण पोलिसांचे पथक पोहोचले असून या युवकाचा मृतदेह पाण्यातून बाहेर काढण्याचे प्रयत्न सुरू आहेत. यासाठी शिवदुर्ग मित्र लोणावळा आणि वन्यजीव रक्षक संस्था मावळ यांना पाचारण करण्यात आले आहे. फिरायला आलेल्या तरुणावर काळाने घाला घातल्याने सर्वत्र हळहळ व्यक्त केली जात आहे.