बिबट्याच्या रेस्क्यूचा हा थरार नीट पाहा. नागपूरात पारडी परिसरात एका घरात बिबट शिरला आणि शहरात एकच खळबळ माजली. त्यात या बिबट्यानं तब्बल सहा ते सात जणांवर हल्ला केल्यानं परिसरात एकच दहशत पसरली. त्यानंतर नागपूर वनविभागाच्या अखत्यारीतील ट्रान्झिट ट्रीटमेंट सेंटरचे बचाव पथक घटनास्थळी पोहचले.

परिसरात मोठा पोलिस बंदोबस्त तैनात करण्यात आला. बघ्यांची मोठ्या संख्येनं गर्दी झाली.त्यामुळे बिबट्या आणखीनच बिथरला.वनविभागाच्या कर्मचाऱ्यांनी बिबट्याला अचूक डार्ट मारला. मात्र तरीही बिबट्याने तब्बल 15 फूट उंच झेप घेतली आणि पळून जाण्याचा प्रयत्न केला. मात्र त्यानंतर तो निपचित पडला आणि त्याला जेरबंद करण्य़ात वनविभागाला यश आलं.

हा बिबट्या जेरबंद झाला तरी त्याची दहशत कमी झालेली नाही. कारण पारडी परिसरात 2 दिवसांपुर्वी बिबट्यासोबत 2 बछडे देखील आढळून आले होते. त्त्यामुळे नागरिकांमध्ये अजूनही भितीचं वातावरण आहे. दरम्यान बिबट्याच्या हल्ल्यात जखमी झालेल्या नागरिकांची वनमंत्री गणेश नाईकांनी चौकशी केली.

विशेष म्हणजे अधिवेशनाचा दुसरा दिवस बिबट्यांच्या हल्ल्यांवरून गाजला. मात्र त्याच्या दुसऱ्याच दिवशी अधिवेशन सुरू असलेल्या उपराजधानी बिबट्यानं धुमाकूळ घातला. त्यामुळे सरकार बिबट्यांची दहशत रोखण्यात कमी पडतंय आणि सध्या केलेल्या उपाययोजना पुरेशा नसल्याचं यामुळे पुन्हा एकदा उघड झालंय. त्यामुळे नागरिकांमधील बिबट्याची दहशत कमी करण्यासाठी सरकार ठोस पावलं उचलणार का हा खरा प्रश्न आहे.