डॉ. माधव सावरगावे, साम टीव्ही, प्रतिनिधी

Court News : छत्रपती संभाजीनगर येथून मोठी बातमी समोर आली आहे. संभाजीनगरच्या जिल्हा सत्र न्यायालयामध्ये एका सरकारी वकिलाला मारहाण करण्यात आली आहे. ही घटना जिल्हा न्यायालयामध्ये संध्याकाळी साडेपाच ते सहा या दरम्यान घडली. या घटनेच्या संदर्भात स्थानिक पोलीस ठाण्यात कायदेशीर कारवाईला सुरुवात झाली आहे.

मिळालेल्या माहितीनुसार, छत्रपती संभाजीनगरच्या जिल्हा सत्र न्यायालयामध्ये ए जी पी देशपांडे या सरकारी वकिलाला मारहाण झाल्याचे समोर आले आहे. दुसऱ्या वकिलाने देशपांडे यांच्या चेंबरमध्ये घुसून त्यांना मारहाण केली. याशिवाय देशपांडेंना बूट देखील फेकून मारला. या घटनेची मोठी चर्चा परिसरात होत आहे.

सर्वोच्च न्यायालयात भारताचे सरन्यायाधीश भूषण गवई यांच्यावर एका वकिलाने बूट फेकण्याचा प्रयत्न केला होता. या वकिलाने सरन्यायाधीशांच्या विरोधात घोषणाबाजीही केली होती. या प्रकरणामुळे देशभरात संताप व्यक्त केला गेला. या घटनेच्या निषेधार्थ संभाजीनगरमध्ये लेखणी बंद निदर्शने आंदोलन ठेवण्यात आले होते.

आंदोलन सुरु असताना वकिलांनी काम न करण्याचा निर्णय घेतला होता. यादरम्यान देशपांडे यांनी त्यांचे काम सुरु ठेवले. याशिवाय लोगो देखील लावला नाही. तेव्हा एडवोकेट महादेव लोखंडे यांनी ए जी पी देशपांडे यांना विचारणा केली. त्यांच्यात वाद झाला. त्यानंतर लोखंडे यांनी देशपांडेंना मारहाण करत बूट फेकून मारला. या घटनेची दखल घेत वेदांत नगर पोलीस ठाण्यात कारवाई सुरु करण्यात आली आहे.