संदीप भोसले, साम टीव्ही

लातूरमध्ये एक धक्कादायक घटना घडली आहे. एका नवविवाहित महिलेचा शॉक लागून मृत्यू झाला आहे. महिला आधी घरात कपडे वाळत घालत होती. या दरम्यान, तिला विजेचा तीव्र धक्का बसला. लगेचच तिला उपचारासाठी लातूर येथील शासकीय रुग्णालयात दाखल करण्यात आले. मात्र, उपचारादरम्यान तिचा मृत्यू झाला. मात्र, या घटनेबाबत तिच्या नातेवाईकांनी संशय व्यक्त करत सासरच्या मंडळींवर गंभीर आरोप केले आहेत. सध्या पोलिसांकडून तपास सुरू आहे.

अर्पिता गौरव शेळके (वय २१) असे मृत विवाहित महिलेचं नाव आहे. पुण्यातून गावी इंजिनिअरिंगची परीक्षा देण्यासाठी आली होती. प्राथमिक माहितीनुसार, अर्पिता घरात कपडे वाळवत असताना तिला विजेचा तीव्र धक्का बसला. लगेचच तिला उपचारासाठी लातूर येथील शासकीय रुग्णालयात दाखल करण्यात आले. मात्र, उपचारादरम्यान तिचा मृत्यू झाला असं डॉक्टरांनी सांगितलं.

या घटनेनंतर महिलेच्या माहेरच्या मंडळींनी रूग्णालयात धाव घेतली. दरम्यान, तिच्या नातेवाईकांनी मृत्यूवर संशय व्यक्त करत गंभीर आरोप केले आहेत. त्यांच्या म्हणण्यानुसार, हा मृत्यू नैसर्गिक नसून त्यामागे काही कारण असण्याची शक्यता आहे. त्यामुळे या प्रकरणात चाकूर पोलीस ठाण्यात रात्री उशिरा गुन्हा नोंद करण्यात आला आहे.

या घटनेचा पोलीस अधिक तपास करीत असून, दोन्ही बाजूने चौकशी सुरू असल्याचं पोलिसांनी सांगितलं. मृत्यूच्या नेमक्या कारणांचा शोध घेण्यासाठी विविध अंगाने चौकशी सुरू असल्याची माहिती सूत्रांनी दिली आहे. दरम्यान, या घटनेनंतर परिसरात शोककळा पसरली आहे.