लातूरमध्ये एचआयव्ही बाधित अल्पवयीन मुलीवर बलात्कार करण्यात आल्याची धक्कादायक घटना समोर आली आहे. लातूर जिल्ह्यातील औसा तालुक्यातील एका नामांकित एचआयव्ही बाधित संस्थेमध्ये हा प्रकार घडला. त्यामुळे एकच खळबळ उडाली. धक्कादायक बाब म्हणजे बलात्कारानंतर पीडित मुलगी गर्भवती राहिली आणि तिचा गर्भपात करण्यात आला. या घटनेमुळे महाराष्ट्र हादरला आहे.

मिळालेल्या माहितीनुसार, लातुरच्या औसा तालुक्यातील एका नामवंत एचआयव्ही बाधित संगोपन संस्थेमध्ये ही हादरवून टाकणारी घटना घडली. पीडित मुलीच्या तक्रारीवरून धाराशिव तालुक्यातील ढोकी पोलिस ठाण्यात ५ जणांविरोधात गुन्हा दाखल करण्यात आला आहे. या संस्थेतील आणखी काही मुलींवर अत्याचार झाला असल्याची तक्रार मुलींनी केली असल्याची माहिती समोर आली आहे. सध्या पोलिस या प्रकरणाचा कसून तपास करत आहेत.

या प्रकरणी बाल लैंगिक अत्याचारासह विविध कलमांतर्गत आरोपींवर गुन्हा दाखल करण्यात आला आहे. ढोकी पोलिसातील गुन्हा औसा पोलिसांकडे वर्ग करण्याची प्रक्रिया सुरू केली आहे. या प्रकरणात आतापर्यंत कोणालाही अटक करण्यात आली नाही. औसा तालुक्यातील या नामवंत संस्थेला अनेक पुरस्कार देखील देण्यात आले आहेत. या घटनेने शिक्षण क्षेत्रात खळबळ उडाली. सध्या पीडित मुलीवर रुग्णालयात उपचार सुरू आहेत.