संदिप भोसले, लातूर|ता. १८ जून २०२४

पंकजा मुंडे यांचा लोकसभा निवडणुकांमधील पराभव जिव्हारी लागल्याने लातूर जिल्ह्यातील अहमदपूर तालुक्यातील येस्तार येथील सचिन मुंडे या तरुणाने आत्महत्या केली होती. आज या मृत तरुणाच्या कुटुंबाची पंकजा मुंडे यांनी भेट घेतली. यावेळी त्यांनी लोकसभा निवडणुकीतील पराभव आणि विधानसभा लढवण्याबाबत महत्वाचे विधान केले आहे.

नेमकं काय म्हणाल्या पंकजा मुंडे?

मी निवडून आले असते तर आज हिरो झाले असते. मी हिरो झालेलं असं कसं कुणाला आवडेल? मलाच काहीतरी द्या यासाठी माझी लढाई नव्हती. लोकसभेसाठी तिकीट जाहीर झाल्यानंतर मला समजलं. मोदीजी पंतप्रधान होतील, देशाचं चांगल होईल, या भावनेने मी लोकसभेच्या रिंगणात उतरले, असे पंकजा मुंडे यावेळी म्हणाल्या.

इशाऱ्याकडे लक्ष ठेवा..

"सगळं सोडून घरी बसायचं असेल तर ही विधानसभा झाल्याशिवाय काही करायचं नाही. पहिल्यावेळी पाच वर्ष वाट पाहावी लागली आता दोनच वर्ष आहेत. ९० दिवस जीव लावा, फक्त इशाऱ्याकडे लक्ष ठेवा, असे आवाहनही पंकजा मुंडे यांनी कार्यकर्त्यांना केले. त्यांच्या या विधानामुळे त्या विधानसभेच्या तयारीत आहेत का? अशाही चर्चा आता रंगू लागल्या आहेत.

"भाग्य लिहिताना कठीणच लिहले आहे. नाहीतर सत्तेत असलेल्या राजा महाराजा परिवारात साहेबांचा जन्म आणि माझा जन्म झाला असता, वरच्या वर्गात जन्माला घातले असते. मात्र आम्हाला कष्ट करणाऱ्याच्या वर्गात जन्माला घातला आहे. तिथेच सांगितले आहे तुमचे आयुष्य साधं नाही, असे म्हणत तुम्ही असे टोकाचे निर्णच घेऊ नका, मी घरी बसू का? अशी विनंती त्यांनी कार्यकर्त्यांना केली.