VIDEO : वर्धापनदिनाआधीच ठाकरे- शिंदेंमध्ये सामना! 'आमची खरी शिवसेना म्हणणाऱ्यांनी स्वतःला आरशात पाहावं', संजय राऊतांचा टोला

मयुर राणे, ता. १८ जून २०२४

हिंदुहृदयसम्राट बाळासाहेब ठाकरे यांनी स्थापन केलेल्या शिवसेना पक्षाचा उद्या वर्धापनदिन. एकनाथ शिंदे यांच्या बंडानंतर शिवसेना पक्षात दोन गट पडल्याने यंदाही दोन वर्धापनदिन साजरे केले जाणार आहेत. यावरुनच आता शिवसेना शिंदे गट अन् ठाकरे गटामध्ये टीका- टिप्पणी सुरू झाली असून स्वतःला खरी शिवसेना समजणाऱ्यांनी एकदा आरशात पाहावं, असे म्हणत संजय राऊत यांनी शिंदे गटावर निशाणा साधला आहे.

काय म्हणाले संजय राऊत?

"उद्या शिवसेनेचा वर्धापन दिन आहे. हिंदुहृदयसम्राट शिवसेनाप्रमुख बाळासाहेब ठाकरे यांनी 58 वर्षांपूर्वी शिवसेनेचा पाया घातला. 58 वर्षांपासून बाळासाहेबांची शिवसेना मुंबई, महाराष्ट्र, दिल्लीत काम करतेय. आम्ही तेव्हापासून त्यांच्या विचारांनी भारावलेले सर्व तरुण, तेव्हापासून बाळासाहेबांच्या विचारांनी भारावून आम्ही भगवा झेंडा आमच्या खांद्यावर घेतला. आम्ही सर्वांनी तुरुंगवास भोगला पण आम्ही आमच्या पक्षाशी इमान कायम ठेवला," असे राऊत म्हणाले.

"आता जर कोणी म्हणत असेल ते शिंदे गट आमची शिवसेना खरी तर त्यांनी स्वतःला आरशात पहावं. बाळासाहेबांनी शिवसेना जेव्हा स्थापन झाली तेव्हा ते कुठे होते? डोम नावाच्या सभागृहात कुठेतरी हे दोन कावळे उद्या जमणार आहेत. आपला पक्ष आहे तो महाराष्ट्राशी दुश्मनी करणाऱ्या मोदी शहांशी चरणाशी ठेवणं याला जनाधार आणि विचारधारा म्हणत नाही," असा खणखणीत टोला संजय राऊत यांनी लगावला.

"जिथे ठाकरे तिथे शिवसेना. हे शिंदे मधेच कुठून उगवले? यांना भाजपने आणलं, हे महाराष्ट्राचे शत्रू आहेत. राज्यात पैशाच्या ताकदीवर पाच सहा जागा जिंकल्या म्हणजे विचारधारा आणि शिवसेना त्यांची होत नाही. असंख्य काँग्रेस पक्ष स्थापन झाले मूळ काँग्रेस पक्ष आजही आहे आणि तोच सर्वात मोठा पक्ष आहे," असेही संजय राऊत यांनी सांगितले.