संदीप भोसले, लातूर|ता. २ फेब्रुवारी २०२४

Latur Breaking News:

प्रत्येक शासकीय नोकरदाराच्या सेवानिवृत्तीचा दिवस हा भावनिक दिवस असतो. हा दिवस खास व्हावा, सदैव आठवणीत राहावा अशी प्रत्येकाची इच्छा देखील असते. असाच एक अगदी खास समारंभ लातूरमध्ये पार पडला. या आगळ्या वेगळ्या निरोप समारंभाची सध्या सर्वत्र चर्चा होत आहे.

गोविंद शिंनगारे हे लातूरच्या तहसील कार्यालयात ३३ वर्षांपासून चालक पदावर कार्यरत होते. आज (२, फेब्रुवारी) गोविंद शिंनगारे हे पदावरुन मुक्त झाले. त्यांचा हा सेवानिवृत्तीचा कार्यक्रम तहसीलदार तसेच इतर सहकारी, अधिकाऱ्यांनी आगळ्या वेगळ्या पद्धतीने साजरा करत खास निरोप दिला. यावेळी वाजत गाजत निरोप देताना सर्व सहकारी भावूक झाल्याचे पाहायला मिळाले.

उपजिल्हाधिकारी तहसीलदार आणि कर्मचाऱ्यांनी गोविंद शिनगारे यांचा सपत्नीक सत्कार देखील केला आहे. तसेच दररोज ते तहसीलदारांची जी शासकीय गाडी चालवाचे , ती गाडी फुलांनी सजवून, स्वतः तहसीलदार सौदागर तांदळे यांनी ती गाडी चालवत गोविंद शिनगारे आणि त्यांच्या पत्नीला घरापर्यंत सोडले.

दरम्यान, आपल्या सहकाऱ्यांनी, अधिकाऱ्यांनी दिलेला हा सन्मान आणि आगळा वेगळा निरोप पाहून चालक गोविंद शिनगारे यांना अश्रू अनावर झाले होते. या सेवानिवृत्ती सोहळ्याची सध्या सर्वत्र चर्चा होत आहे. (Latest Marathi News)

('साम टीव्ही'चं व्हॉट्सअँप चॅनल जॉईन करण्यासाठी येथे क्लिक करा)