ऐकलंत...यांचं नाव वगळा माझं नको. असा संवाद आता घराघरात ऐकायला मिळतोय. त्याला निमित्त ठरलंय लाडकीची पडताळणी....लाडकी बहिण योजनेची वर्षपूर्ती होत असताना अपात्र लाभार्थ्यांकडे सरकारने लक्ष वळवलं आहे. अंगणवाडी सेविकांकडून घरोघरी जाऊन पडताळणी केली जात आहे. मात्र त्यामुळे योजनेचा लाभ कोणी घ्यायचा यावरुन कुटुंबामध्ये महाभारत रंगलं आहे. 1500 रुपयांवर कोण पाणी सोडणार यावरून सासू-सुन आणि जाऊबाईंमध्ये वाद वाढले आहेत. छत्रपती संभाजीनगर जिल्ह्यात गावागावात अंगणवाडी सेविका यांच्या मदतीने पडताळणीचे काम सुरू झाले आहे त्याची माहिती जिल्हाधिका-यांनी दिली.

अपात्र ठरवण्याचे नियम कोणते आहेत ते पाहूया.

अपात्र ठरवण्याचे नियम

एकाच कुटुंबातील दोनपेक्षा अधिक महिला लाभार्थी

शासकीय कर्मचारी

चारचाकी वाहन असणे

वय 21 वर्षांपेक्षा कमी आणि 65 वर्षांपेक्षा जास्त

विधानसभा निवडणुकीच्या तोंडावर ‘लाडकी बहीण’ योजनेच्या अर्जांची छाननी न करता सरसकट सर्व महिलांना लाभ देण्यात आला. मात्र आता प्रत्येक जिल्ह्यात पडताळणी सुरु झाली आहे. सोलापूर जिल्ह्यात एक लाख 4 हजार लाडक्या बहिणींची पडताळणी सुरु आहे. शासनाकडून ज्या याद्या प्राप्त झाल्या आहेत त्यानुसार अंगणवाडी सेविका पडताळणी करतायत.

या योजनेमुळे राज्याच्या तिजोरीवर मोठा ताण पडत आहे. अनेक योजनांसाठीचा निधी या योजनेसाठी वळवण्यात आला आहे. याच कारणास्तव सरकारने आता निकषांची चाळणी लावून लाभार्थी महिलांची संख्या कमी करण्याचा सपाटा सुरू केला आहे.

मात्र त्यामुळे नाव कोणाचं कमी करायचं त्यावरुन घराघरात भांडणाचे सूर कानी पडत आहेत. पडताळणीमध्ये अनेक महिलांचा पत्ता कट होणार आहे. त्यामुळे लवकरच खऱ्या पात्र लाडकींची संख्या समोर येईल आणि फक्त गरजूंनाच लाभ मिळेल अशी अपेक्षा करुया.