कोल्हापूर जिल्ह्यातील उजळाईवाडी परिसरात एक ह्रदयद्रावक घटना घडली आहे. क्रिकेट खेळत असताना मुलाचा विजेचा शॉक लागून मृत्यू झाला आहे. घटनेच्या दिवशी मुलगा शेजारच्या घराच्या टेरेसवर मित्रांसोबत क्रिकेट खेळायला गेला होता. दरम्यान, मुलाचा उच्चदाब विद्युतवाहिनीच्या संपर्कात येऊन मृत्यू झाला. या घटनेनंतर मुलाच्या कुटुंबावर दुखा:चा डोंगर कोसळला आहे.

मिळालेल्या माहितीनुसार, ही घटना शुक्रवारी दुपारच्या सुमारास घडली. अफान असिफ बागवान असे मृत मुलाचे नाव आहे. तो कोल्हापूर जिल्ह्यातील उजळाईवाडी परिसरात राहत होता. शुक्रवारी शाळेला सुट्टी होती. यामुळे अफान सकाळी मित्रांसोबत क्रिकेट खेळण्यासाठी घराबाहेर पडला.

तो टेरेसवर मुलांसोबत क्रिकेट खेळत होता. खेळादरम्यान चेंडू शेजारी राहणाऱ्या हनुमंत खांडेकर यांच्या इमारतीच्या छतावर गेला. चेंडू आणण्यासाठी अफान टेरेसवर गेला होता. दरम्यान, घराच्या अगदी दीड ते दोन फूट अंतरावरून जाणाऱ्या ११,००० व्होल्ट क्षमतेच्या उच्चदाब विद्युतवाहिनीचा त्याला स्पर्श झाला. लगेचच अफानला विद्युत धक्का बसला. त्याचा जागीच तडफडून मृत्यू झाला.

घटनेनंतर परिसरातील नागरिकांनी घटनास्थळी धाव घेतली. तसेच मुलाला रूग्णालयात नेले. मात्र, त्याची प्राणज्योत मालवली. या घटनेनंतर परिसरात शोककळा पसरली आहे.