रणजित माजगावकर, कोल्हापूर

आई-वडिलांनी काबाड कष्ट करत पै पै जमवली. या पैशातून त्यांना म्हशी घ्यायच्या होत्या. पण मुलाने फ्री फायर गेमसाठी तब्बल ५ लाख रुपये उडवले. ही धक्कादायक घटना कोल्हापुरात घडली आहे. सध्या या घटनेची जिल्हाभर नाही तर संपूर्ण राज्यभर चर्चा होत आहे. या प्रकरणी पोलिस ठाणयात तक्रार दाखल करण्यात आली होती. पोलिसांनी या घटनेचा उलगडा केला आहे. सध्या पोलिस तपास करत आहेत.

मिळालेल्या माहितीनुसार, कोल्हापूर जिल्ह्यातील राधानगरी तालुक्यातील एका शेतकऱ्याने म्हशी घेण्यासाठी ७ लाख रुपये बँक खात्यात साठवले होते. पण सहावीत शिकणाऱ्या त्यांच्या मुलाने मोबाइलवर 'फ्री फायर' गेम खेळताना नकळत काही अॅप घेतले आणि काही क्षणांत बँक खात्यातील ५ लाखांची रक्कम गायब झाली. त्यामुळे या शेतकऱ्याला मोठा धक्का बसला.

बँक खात्यातील पैसे गेल्याचे लक्षात येताच शेतकऱ्याने पोलिस ठाण्यात धाव घेतली. पैस गेल्याच्या मेसेजमधील ट्रान्झेक्शन आयडीवरून सायबर पोलिसांनी गुन्ह्याचा उलगडा केला. बँक खात्याशी कनेक्ट असलेला मोबाइल नंबर लहान मुलांच्या हाती दिल्यानंतर काय होऊ शकते, याचा चांगला धडा पालकांना मिळाला. आता यापुढे मुलांच्या हातात मोबाईल देताना पालकांना खबरदारी घेणं खूपच गरजेचे आहे.

राधानगरी तालुक्यातील या शेतकऱ्याने म्हशींचा गोठा करून चांगला जम बसवला होता. नवरा-बायको दोघे काबाड कष्ट करून गोठा आणखी वाढविण्याच्या विचारात होते. यासाठी ते बँक खात्यात पैसे साठवत होते. मे महिन्यात ते हरियाणातून ४ म्हशी विकत घेणार होते. त्यासाठी ते बँकेत गेले. बँकेत गेल्यानंतर त्यांना मोठा धक्का बसला. कारण त्यांनी बँक खात्यात साठवलेले पैसे गायब झाल्याचे त्यांच्या लक्षात आले. खात्यावर असलेल्या ७ लाखांपैकी फक्त २ लाख रुपये शिल्लक राहिले होते.

स्टेटमेंट काढल्यावर खात्यातून ऑनलाइन पैसे गेल्याचे त्यांच्या लक्षात आले. बँकेने हात झटकून पोलिसांकडे जाण्याचा सल्ला दिला. शेतकऱ्याने सायबर पोलिस ठाणे गाठले. पोलिसांनी शेतकऱ्याचा मोबाईल तपासायला सुरुवात केली. बँकेतील स्टेटमेंटनुसार मोबाइलमधील मेसेज तपासले. मात्र, त्यात एकही मेसेज नव्हता. ट्रान्झेक्शन आयडीवरून शोध घेतल्यानंतर काही रक्कम 'फ्री फायर' गेममधील आभासी शस्त्र खरेदीसाठी गेल्याचे लक्षात आले. यानंतर या शेतकऱ्याला मोठा धक्का बसला. मुलाच्या हातात मोबाईल देणं त्यांना चांगलेच महागात पडले. पोलिस सध्या या प्रकरणाच तपास करत आहेत.