रणजीत माजगांवकर, साम टीव्ही

राज्यातील प्रस्तावित शक्तिपीठ महामार्गाच्या मुद्द्यावरून कोल्हापूरमध्ये राजकीय वातावरण चांगलेच तापले आहे. या महामार्गाच्या समर्थनासाठी आणि विरोधासाठी आता सत्ताधारी आणि विरोधी पक्षातील आमदारांमध्ये जोरदार कलगीतुरा रंगल्याचे पाहायला मिळत आहे. या महामार्गाला विरोध करण्यासाठी उद्या कोल्हापूरमध्ये एका भव्य महामोर्चाचे आयोजन करण्यात आले आहे. या पार्श्वभूमीवर काँग्रेसचे आमदार सतेज पाटील यांनी सरकारवर हल्लाबोल केला असून हा प्रकल्प शेतकरी आणि सर्वसामान्य जनतेवर जबरदस्तीने लादला जात असल्याचा गंभीर आरोप केला आहे.

या शक्तिपीठ महामार्गाची महाराष्ट्राला आणि कोल्हापूरला खरोखर गरज आहे का? गरज नसलेल्या या महामार्गावर हजारो कोटी रुपयांची उधळपट्टी करण्यापेक्षा तोच निधी ग्रामीण भागातील रस्ते, आपले ऐतिहासिक गड किल्ले आणि मंदिरांच्या विकासासाठी वापरावा. सरकार शेतकऱ्यांच्या जमिनी बळकावून हा प्रकल्प जनतेवर लादत आहे, त्याला आमचा तीव्र विरोध राहील असे काँग्रेसचे आमदार सतेज पाटील म्हणाले.

दुसरीकडे, महायुतीचे नेते आणि शिवसेना आमदार राजेश क्षीरसागर यांनी विरोधकांचे सर्व आरोप फेटाळून लावत महामार्गाचे जोरदार समर्थन केले आहे. मोठे महामार्ग हेच राज्याच्या आणि देशाच्या विकासाचे खरे माध्यम असतात, असे सांगत त्यांनी सतेज पाटलांवर पलटवार केला.

शक्तिपीठ महामार्ग हा मुख्यमंत्री देवेंद्र फडणवीस आणि महायुती सरकारचा अत्यंत महत्त्वाकांक्षी प्रकल्प आहे. यामुळे विकासाला मोठी गती मिळणार आहे. विरोधक केवळ राजकारणासाठी या प्रकल्पाला विरोध करत आहेत. त्यांनी कितीही आंदोलनं किंवा मोर्चे काढले, तरी शक्तिपीठ महामार्ग होणारच असा ठाम निर्धार आमंदार राजेश क्षीरसागर यांनी व्यक्त केला.