रणजीत माजगावकर, कोल्हापूर

कोल्हापुरमध्ये संतप्त झालेल्या ग्रामस्थांनी तलाठी आणि पशुवैद्यकीय अधिकाऱ्याला कार्यालयामध्ये कोंडल्याचा प्रकार घडला. शिरोळ तालुक्यातील शिरढोण गावात ही घटना घडली आहे. पुरस्थितीत काम करण्यास नकार दिल्याने ग्रामस्थ संतप्त झाले आहेत. जनावरांचा चारा आणि औषध देण्याचा सूचना तहसीलदारांनी केल्या होत्या. मात्र तहसीलदार गेल्यानंतर काम करण्यास नकार देणाऱ्या अधिकाऱ्याना संतप्त होत गावकऱ्यांनी कार्यालयामध्येच कोंडलं.

कोल्हापुरातील पूरग्रस्तांना कोणत्याही सुविधा नाहीत की मदत नाही. प्रशासनाच्या ढिम्म कारभारामुळे पूरग्रस्त आणि जनावरांचे हाल होत असल्याने शिरोळ तालुक्यातील शिरढोण इथे अन्याय निवारण कृती समितीतर्फे गाव चावडीसमोर सोमवारी धरणे आंदोलन करण्यात आले. होते. यावेळी पूरग्रस्त आणि अधिकाऱ्यांमध्ये वादावादी झाल्याने संतापलेल्या पूरग्रस्तांनी पशुवैद्यकीय पर्यवेक्षक, तलाठी, कृषी सेवक, आरोग्य सेवक, मंडल अधिकारी, ग्राम विकास अधिकारी यांना तलाठी कार्यालयातच कोंडून ठेवले.

संतप्त झालेल्या महिलांनी तलाठी कार्यालयाची कडी बाहेरून लावून घेतली. त्यामुळे तणावाचे वातावरण निर्माण झाले होते. अधिकाऱ्यांच्या माफीनंतर पूरग्रस्त शांत झाले. शिरढोण इथल्या पंचगंगा नदीला आलेल्या पुरामुळे स्थलांतरित झालेल्या कुटुंबांना सेवा मिळावी. जनावरांच्या चाऱ्याची व्यवस्था व्हावी, पूरबाधित पिकांचा पंचनामा केला जावा, या मागणीसाठी कृती समितीने सोमवारी सकाळी शिरढोन गाव चावडीसमोर धरणे आंदोलन केले होते.

दरम्यान, मागच्या आठवड्यामध्ये झालेल्या मुसळधार पावसामुळे कोल्हापूरमध्ये पूरस्थिती निर्माण झाली होती. पूरामुळे कोल्हापूर शहरासह अनेक भागांमध्ये मोठे नुकसान झाले. अनेकांच्या घरामध्ये पाणी शिरले, संसारउपयोगी साहित्याचे नुकसान झाले. तर शेती पाण्याखाली गेल्यामुळे शेतपिकाचे मोठे नुकसान झाले. जनावरांना साठवून ठेवलेला चारा देखील पूरामध्ये वाहून गेला. कोल्हापुरातील पूराचे पाणी ओसरला पण कोल्हापुरकरांच्या डोळ्यामध्ये पाणी आले आहे.