रणजित माजगावकर 

कोल्हापूर : शाळेच्या प्रवेशद्वाराचे लोखंडी गेट अंगावर पडून सहावीत शिकणाऱ्या विद्यार्थ्यांचा जागीच मृत्यू झाल्याची दुर्दैवी घटना कोल्हापूर जिल्ह्यात घडली आहे. या घटनेमुळे खळबळ उडाली असून घटनेनंतर ग्रामस्थांनी शाळेत गोंधळ घातला होता. 

कोल्हापुर (Kolhapur News) जिल्ह्यातील करवीर तालुक्यातील केर्ले गावात आज सकाळी ही दुर्दैवी घटना घडली आहे. या घटनेत स्वरूप दिपकराज माने असे मृत्यू झालेल्या विद्यार्थ्यांचे नाव आहे. केर्ले येथील कुमार व कन्या हायस्कूलमध्ये स्वरूप माने हा सहावीच्या वर्गात शिकत होता. नेहमीप्रमाणे तो आज सकाळी शाळेत गेला होता. तो गेटजवळ आला असताना लोखंडी गेट तुटून पडल्याने त्याखाली तो दबला जाऊन यात त्याचा मृत्यू झाला. 

घडलेल्या या दुर्दैवी घटनेनं परिसरात हळहळ व्यक्त होत आहे. दरम्यान सदर मुलगा हा लघूशंकेसाठी जात असताना शाळेचे गेट अंगावर पङल्याने (Student) विद्यार्थ्यांचा मृत्यू झाल्याचं शाळा प्रशासनाने सांगितले. मात्र या घटनेने शाळा प्रशासनाची बेपर्वाई समोर आली असून मुलाच्या मृत्यूमुळे पालकांनी एकच आक्रोश केला. तर ग्रस्थानी शाळेत गोंधळ घातला होता. तसेच घोषणाबाजी करत शिक्षक व शाळा प्रशासनाला जाब विचारला. यामुळे काही वेळ तणाव निर्माण झाला होता.