रणजित माजगावकर, कोल्हापूर

कोल्हापूरमधून धक्कादायक बातमी समोर आली आहे. कोल्हापूरमध्ये (Kolhapur) गुप्तधन मिळवण्यासाठी नरबळी देण्याचा प्रयत्न करण्यात आला आहे. राधानगरी तालुक्यातील कौलव गावात हा धक्कादायक प्रकार घडला आहे. सरपंचामुळे हा सर्व प्रकार उघडकीस आला असून मोठा अनर्थ टळला आहे. याप्रकरणी कोल्हापूरच्या राधानगरी पोलिसांनी (Radhanagari Police) ६ जणांविरोधात गुन्हा दाखल केला आहे.

मिळालेल्या माहितीनुसार, राधानगरी तालुक्यातील कौलव गावामध्ये राहणाऱ्या शरद माने यांच्या घरामध्ये गुप्तधनासाठी नरबळी देण्याचा प्रयत्न केला जात होता. पण याच गावचे सरपंच रामचंद्र कुंभार यांच्या सतर्कतेमुळे मोठा अनर्थ टळला. त्यांनी हा सर्व प्रकार उघड केला. शरद माने यांच्या घरामध्ये मोठा खड्डा खोदून त्याठिकाणी धार्मिक विधी सुरू होते. घटनास्थळावर अंगारा, हळद- कुंकू, गुलाल, लिंबू हे सर्व साहित्य देखील होते.

याप्रकरणी कराडचा मांत्रिक चंद्रकांत धुमाळ यांच्यासह सहा जणांच्याविरोधात कोल्हापूरच्या राधानगरी पोलिस ठाण्यामध्ये गुन्हा दाखल करण्यात आला आहे. नरबळी आणि जादूटोणा कायद्यान्वये या सहाही जणांविरोधात गुन्हा दाखल करण्यात आला आहे. राधानगरी पोलिस या प्रकरणाचा तपास करत आहेत. अद्याप कोणालाही अटक करण्यात आली नाही.