कोल्हापूर: गेल्या काही दिवसापासून खासदार धनंजय महाडिक (Dhananjay Mahadik) आणि माजी मंत्री आमदार सतेज पाटील यांच्यात आरोप-प्रत्यारोप सुरू आहेत. 'पुढच्या काळात महाभारत घडेल असा इशारा सतेज पाटील यांनी महाडिक यांना दिला होता, यावर सतेज पाटील यांनी आम्ही रामायण घडवणारी माणसे आहोत म्हणत प्रत्युत्तर दिले होते. या टीकेला आता खासदार धनंजय महाडिक यांनीही प्रत्युत्तर देत हल्लाबोल केला आहे.

यावर बोलताना धनंजय महाडिक (Dhananjay Mahadik) म्हणाले, कैकयीने कपटाने प्रभू रामचंद्रांना वनवासात पाठवले होते. त्याच कपटी कारस्थानाचा मी बळी पडलो आणि माझा घात झाला. त्यातून आपण जिल्ह्यात महाभारत होईल असे म्हटले. रामायण रावणामुळे घडवले, ते स्वताला रावण समजतात का? जर राम समजत असतील तर प्रभू रामचंद्र हे एक वचनी होते. आम्हाला रणांगण नवीन नाही पण सत्तेचा उन्माद इतका बरा नसतो, असा टोलाही लगावला.

कोल्हापूर जिल्ह्यातील राजकारणात आता पुन्हा बदल होणार असल्याचा इशारा धनंजय महाडिक यांनी काही दिवसापूर्वी दिला होता. काही दिवसात कोल्हापूर महापालिकेच्या निवडणुका होणार आहेत. दोन्हीकडून या निवडणुकांची तयारी सुरू आहे.

पुन्हा गोकुळ दूध संघ महाडिक गट ताब्यात घेणार असल्याच्या चर्चा सुरू झाल्या होत्या. यावर बोलताना महाडिक म्हणाले, आम्हाला ‘गोकुळ’च्या सत्तेत स्वारस्य नाही. हिसकावून घेण्याची आमची पध्दत नाही, केवळ संघाची अधोगती थांबवणे एवढेच आपले काम आहे, असंही महाडिक म्हणाले.