अभिजित देशमुख 

कल्याण : चोरीच्या घटनेत संशयित असलेल्या चोरट्याला पोलिसांनी इराणी वस्तीतून ताब्यात घेतले होते. चोरट्याला घेऊन परतत असताना इराण्यांनी पोलिसांच्या पथकावर दगडफेक केली. हा प्रकार कल्याण जवळील आंबिवलीतील इराणी वस्तीत घडला असून या दगडफेकीत एक पोलिस अधिकारी गंभीर जखमी झाला आहे. 

इराणी वस्तीच्या परिसरात पोलिसांवर हल्ला झाल्याच्या घटना अनेकदा घडल्या आहेत. यामुळे याठिकाणी पोलिसांचे पथकच जात असते. मात्र कल्याण जवळील आंबिवली इराणी वस्तीत बुधवारी रात्रीच्या सुमारास इराण्यांनी पुन्हा एकदा पोलीस पथकावर दगडफेक केल्याची घटना घडली आहे. रात्रीच्या सुमारास मुंबई एमआयडीसी पोलिसांनी तौफिक नावाच्या चोरट्याला इराणी वस्तीतून ताब्यात घेतले होते. 

इराणी वस्तीतून तोफिकला ताब्यात घेऊन काही अंतरावर पोलीस गेले असतानाच अचानक इराणी जमावाने विरोध करत पोलिसांवर दगडफेक करण्यास सुरुवात केली. अचानक दगडफेक झाल्याने पोलिसांनी थेट आंबिवली रेल्वे स्थानक गाठले. मात्र या इराणी जमावाने पोलिसांचा पाठलाग करत रेल्वे स्थानकात देखील पोलिसांवर तुफान दगडफेक केली. यामुळे रेल्वे स्टेशन परिसरात प्रचंड खळबळ उडाली होती.  

दरम्यान पथकावर झालेल्या दगडफेकीत पोलीस अधिकारी यशवंत पालवे गंभीर जखमी झाले आहेत. जखमी पोलिसाला लागलीच उपचारासाठी रुग्णालयात दाखल करण्यात आले आहे. तर या घटनेनंतर पोलिसांनी हल्लेखोर आरोपींचा शोध सुरू केला आहे. यापूर्वीही इराणी वस्तीत पोलिसांवर हल्ले झाल्याचे समोर आले आहे.