प्रवाशांसाठी महत्त्वाची बातमी! मुंबई महानगर प्रदेशाला (MMR) थेट मराठवाड्याशी जोडणाऱ्या कल्याण–लातूर जनकल्याण एक्सप्रेसवेला राज्य सरकारकडून हिरवा कंदील मिळाला आहे. सुमारे ४४२ किलोमीटर लांबीचा आणि सहा पदरी ग्रीनफिल्ड एक्सप्रेसवे उभारण्याचा प्रस्ताव असून, या प्रकल्पाची अंदाजे किंमत तब्बल ३५ हजार कोटी रुपये आहे. महाराष्ट्र राज्य रस्ते विकास महामंडळाकडून (MSRDC) या प्रकल्पाची उभारणी केली जाणार आहे.

कल्याणहून लातूरला जाण्यासाठी सुमारे १० ते ११ तासांचा वेळ लागतो. मात्र, हा एक्सप्रेसवे पूर्ण झाल्यानंतर हा प्रवास अवघ्या चार तासांत पूर्ण होण्याची शक्यता आहे. त्यामुळे मुंबई, ठाणे आणि मराठवाड्यातील नागरिकांसह उद्योग आणि मालवाहतुकीलाही मोठा फायदा होणार आहे. या एक्सप्रेसवेचे एक महत्त्वाचे वैशिष्ट्य म्हणजे माळशेज घाट परिसरात तब्बल ८ किलोमीटर लांबीचा बोगदा बांधण्यात येणार आहे. त्यामुळे घाटातील वळणावळणाचे रस्ते, चढ-उतार आणि वाहतूक कोंडी टाळता येणार आहे.

कल्याणपासून सुरू होणारा हा महामार्ग मुरबाड, माळशेज घाट, ओतूर-आळेफाटा, अहिल्यानगर, पाथर्डी, बीड, मांजरसुंभा आणि अंबाजोगाई मार्गे लातूरपर्यंत जाणार आहे. या मार्गावर एकूण १७ इंटरचेंज प्रस्तावित आहेत. विशेष म्हणजे, हा एक्सप्रेसवे राज्यातील अनेक महत्त्वाच्या महामार्ग आणि कॉरिडॉरशी जोडला जाणार आहे. दिल्ली–मुंबई एक्सप्रेसवेच्या विरार–जेएनपीटी लिंकशी तसेच विरार–अलिबाग मल्टीमॉडल कॉरिडॉरशी जोडणी झाल्यावर नवी मुंबई, नवी मुंबई आंतरराष्ट्रीय विमानतळ, अटल सेतू आणि जेएनपीटी बंदरापर्यंत पोहोचणे अधिक सोपे होईल.

लातूरच्या दिशेने या एक्सप्रेसवेची नागपूर–गोवा शक्तिपीठ एक्सप्रेसवेशी जोडणी आहे. त्यामुळे विदर्भ, मराठवाडा, कोकण आणि गोवा यांच्यातील संपर्क आणखी मजबूत होणार आहे. तसेच सूरत–चेन्नई आर्थिक कॉरिडॉरशी जोडणी झाल्यास दक्षिण भारताकडे जाणाऱ्या वाहतुकीलाही मोठा फायदा मिळू शकतो. एकूणच, कल्याण–लातूर एक्सप्रेसवे हा केवळ प्रवासाचा वेळ कमी करणारा प्रकल्प नसून मुंबई, मराठवाडा, विदर्भ, कोकण आणि दक्षिण भारताला जोडणारा महत्त्वाचा आर्थिक कॉरिडॉर ठरण्याची शक्यता आहे.