अक्षय शिंदे 
जालना : शाळेत जाणाऱ्या मुली देखील आता सुरक्षित राहिलेल्या नाहीत. मुलींची छेडछाड करणे व अत्याचाराच्या घटना सातत्याने घडत असुंन जिल्हा परिषदेच्या शाळेत चौथीच्या वर्गात शिकणाऱ्या विद्यार्थिनीची तिच्याच वर्ग शिक्षकाकडून छेडछाड झाल्याची धक्कादायक घटना जालना जिल्ह्यात समोर आली आहे. यात संतप्त ग्रामस्थांनी शिक्षकाला चांगलाच चोप देत पोलिसांच्या स्वाधीन केले आहे. 

जालना जिल्ह्यातील शेवगा या गावातील जिल्हा परिषदेच्या शाळेत हि धक्कादायक घटना घडली आहे. बदलापूर येथे शालेय विद्यार्थिनीवर झालेल्या अत्याचाराची घटना राज्यात चांगलीच गाजत आहे. या घटनेनंतर राज्यातील सर्वच शाळांमधील विद्यार्थिनींच्या सुरक्षिततेचा प्रश्न ऐरणीवर आला होता. यानंतर जालना जिल्ह्यात चौथीच्या वर्गात शिक्षण घेणाऱ्या विद्यार्थिनीची छेड काढण्याची घटना समोर आली आहे. 

ग्रामस्थांनी शिक्षकाला दिला चोप 

वर्ग शिक्षकाने मुलीची छेडछाड केल्याची घटना घडल्यानंतर घडल्या प्रकाराबाबत मुलीने घरी सांगितले. यानंतर शेवगा ग्रामस्थांनी आणि सरपंचांनी या नराधम शिक्षकाला चांगलाच चोप दिला. यानंतर शिक्षकाला मौजपुरी पोलिसांच्या हवाली केले आहे. दरम्यान सध्या या प्रकरणी जालन्यातील मौजपुरी पोलीस ठाण्यामध्ये गुन्हा दाखल करण्याची प्रक्रिया सुरू आहे.

विद्यार्थिनींच्या सुरक्षिततेचा प्रश्न ऐरणीवर 

राज्यात बदलापूर येथील घटनेचे पडसाद राज्यभरात उमटले होते. बदलापूरच्या घटनेनंतर शाळांमधील विद्यार्थिनींच्या सुरक्षिततेचा प्रश्न ऐरणीवर आला होता. यानंतर सर्व शाळांमध्ये सीसीटीव्ही कॅमेरे बसविण्याचे आदेश देण्यात आले होते. मात्र या आदेशानुसार सर्वच शाळांमध्ये सीसीटीव्ही कॅमेरे बसलेले नाहीत. यानंतर जालना जिल्ह्यात चिमुकलीचे छेडछाड झाल्याची घटना घडल्याने पुन्हा एकदा जिल्हा परिषदेच्या शाळेत विद्यार्थिनींचा सुरक्षेचा प्रश्न ऐरणीवर आला आहे.