Bank Scam : दामदुप्पट रक्कमेसाठी बँकेत अफरातफर; बँक मॅनेजरसह नऊजण ताब्यात

शुभम देशमुख 
भंडारा : आपण दिलेल्या रक्कमेची दामदुप्पट करण्याच्या अनुषंगाने बँकेत अफरातफर करण्यात आली आहे. साधारण पाच कोटी रुपयांचे सहा कोटी रुपये मिळण्याच्या आमिषाला बँक मॅनेजरच बडी पडला असून यात तो फसला आहे. हा प्रकार भंडारा जिल्ह्यातील तुमसर येथे घडला असून या प्रकरणी ॲक्सिस बँकेच्या मॅनेजरसह नऊ जणांना पोलिसांनी ताब्यात घेतले आहे. 

'लकी भास्कर' या वेब सिरीज सारख्या बँकेच्या पैशांची अफरातफर करून कोटी पैसे कमविणे बँक मॅनेजर महागात पडले आहे. पैसे दुप्पट करून मिळण्याच्या आमिषाला बळी पडत भंडारा जिल्ह्यातील तुमसर येथील ॲक्सीस बँकेच्या शाखा व्यवस्थापकाने बँकेतील विविध खात्यांमधुन ५ कोटी काढल्याची घटना घडली आणि एकच खळबळ माजली आहे. या प्रकरणी शाखा व्यवस्थापकासह पैसे दामदुप्पट करून देण्याचे आमिष दाखवून लुटणाऱ्या टोळीतील ९ जणांना चौकशीसाठी ताब्यात घेतले आहे. 

छत्तीसगडच्या टोळीने दिले आमिष 

छत्तीसगड आणि गोंदीया येथील या टोळीने तुमसर येथील ॲक्सीस बँकेच्या शाखा व्यवस्थापकाला जाळ्यात ओढून ५ कोटींचे ६ कोटी देण्याचे आमिष दाखवले. या आमिषाला बळी पडत शाखा व्यवस्थापकाने बँकेतूनच ५ कोटींची रोख काढून तुमसर येथील राजकमल ड्रायक्लिनर्स या दुकानात ठेवले होते. दरम्यान सूत्रांकडून मिळालेल्या माहितीनुसार पोलिसांनी धाड घालत चौकशी केली असता हा प्रकार पुढे आला. 

आरोपींची संख्या वाढण्याची शक्यता 

बँकेत अफरातफर झाल्याच्या प्रकरणात मोठे जाळे असण्याची शक्यता आहे. सदर प्रकरणी नऊ जणांची चौकशी सुरु असून सदर प्रकरणात काही दिल्लीच्या तर काही रायपूर आणि काही गोंदियाच्या लोकांचाही समावेश असून तपासादरम्यान पुढे आरोपींमध्ये आणखी वाढ होण्याची शक्यता पोलीस अधीक्षक नुरुल हसन यांनी व्यक्त केली आहे.