जालन्यातील भाजपचे आमदार नारायण कुचे हे सध्या शेतकऱ्याचे कथित प्रकरणावरून वादाच्या भोवऱ्यात सापडले आहेत. जामखेड येथील युनियन बँकेचे मॅनेजर ललित शिर्लेकर यांना फोनवरून शिवीगाळ करत धमकी दिल्याचा प्रकार समोर आला आहे. त्यांच्यातील संभाषणाची ऑडिओ क्लिप सध्या सोशल मीडियावर व्हायरल होत असून, यामुळे खळबळ उडाली आहे. मिळालेल्या माहितीनुसार, ही घटना तीन दिवसांपूर्वीची आहे. या घटनेनंतर बँक कर्मचारी संघटनेनं जालना जिल्हाधिकारी आणि पोलीस अधिक्षकांकडे तक्रार दाखल केली आहे.

नेमक प्रकरण काय?

जालना जिल्ह्यातील युनियन बँकेच्या शाखेत एका शेतकऱ्याचं कर्ज थकीत झाल्यामुळे त्यांचं एफडी खातं गोठवण्यात आलं. या प्रकरणाची माहिती भाजप आमदार नारायण कुचे यांना मिळाली. त्यांनी तातडीने युनियन बँकेचे मॅनेजर ललित शिर्लेकर यांना फोन केला. तसेच संवादादरम्यान, त्यांनी काम करण्यासाठी दबाव टाकला.

संभाषणादरम्यान, 'तुम्हाला एवढी मस्ती असेल तर, नीट करायला देखील मी लय पक्का आहे. एवढा माज, एफडीवाल्याला त्रास, ग्राहक सेवा द्यायला त्रास आहे का तुमचा. मी चांगल्या भाषेत तुम्हाला समजावून सांगितलंय, नाही समजलं तर आल्यावर हाताने समजावून सांगतो', अशा शब्दांत त्यांनी थेट धमकी दिली.

ऑडिओ क्लिपमधील संभाषण

आमदार कुचे- मॅनेजर साहेब आवाज येतोय का?

बँक मॅनेजर- नमस्कार साहेब.

आमदार कुचे- तुम्ही आमचं काय ऐकत नाही, माझ्या पद्दतीने बँकेत यावं लागतंय..

बँक मॅनेजर- साहेब, आमच्या हातात नाही ना, मी यासंदर्भात हेड ऑफिसला रिक्वेस्ट पाठवली आहे.

आमदार कुचे- एवढी मस्ती असलेला मॅनेजर मी आजपर्यंत पाहिलेला नाही.

बँक मॅनेजर- सर, थकीत असल्यामुळे, त्यांचं खातं गोठवलंय.

आमदार कुचे- तुम्हाला एवढी मस्ती असेल तर, नीट करायला देखील मी लय पक्का आहे. एवढा माज, एफडीवाल्याला त्रास, ग्राहक सेवा द्यायला त्रास आहे का तुमचा. जसं काय हे तुमच्या बापाचं आहे. आम्ही सरकारचे प्रतिनिधी आहोत. एवढा माज चढला आहे का तुम्हाला?

आमदार कुचे- तूला आतापर्यंत तीनदा समजावून सांगितलंय. ####दुसऱ्यांदा फोन करतोय तुला..

बँक मॅनेजर- सर, मी लेटर पाठवले आहे.

आमदार कुचे- काय पाठवलंय, नीट शिफारस कर की, रेकॉर्डींग करून घे, तुमत्यामुळे शेतकऱ्यांवर आत्महत्या करण्याची वेळ आली आहे.

बँक मॅनेजर- थकीत कर्ज असणाऱ्याचे हेड ऑफिस लॉक होत असतं. यासाठी अर्ज फॉरवर्ड केलेला आहे, सर..

आमदार कुचे- मी चांगल्या भाषेत तुम्हाला समजावून सांगितलं आहे, ऐकलं नाही तर आल्यावर सांगतो... तुमची इच्छा असेल तर..

बँक मॅनेजर- सर मी पाठवले आहे, हवं असल्यास तिथला पण नंबर देतो.

आमदार कुचे - रोहित धुळे म्हणून आहेत, त्याला ग्राहक सेवा केंद्र पाहिजे..तेवढं करून द्या..

बँक मॅनेजर- होहो सर..

या घटनेनंतर बँक कर्मचारी संघटनेने जालना जिल्हाधिकारी आणि पोलीस अधीक्षकांकडे तोंडी तक्रार दाखल केली आहे. या प्रकारामुळे सरकारी अधिकाऱ्यांवर होणाऱ्या दबावाच्या प्रकारावरही प्रश्न उपस्थित झाला आहे.