सावदा (जळगाव) : कार व दुचाकीची समोरासमोर धडक होऊन भीषण अपघात झाला. या अपघातात दुचाकीवरील (Jalgaon) दोघांचा जागीच मृत्यू झाला. तर कार चालक देखील या अपघातात जखमी झाला आहे. त्याला लागलीच रुग्णालयात उपचारासाठी दाखल करण्यात आले आहे.  

सदरचा अपघात (Accident) सावदा- पाल महामार्गावर सावदा- कोचूर दरम्यान घडला. या अपघातात चिनावल येथील वीरेंद्र सुनील नेमाडे (वय २७) व अनिल चुडामण मेढे (वय ६५) यांचा मृत्यू झाला. वीरेंद्र नेमाडे व अनिल मेढे हे दुचाकीने जात होते. या दरम्यान समोरून भरधाव वेगाने कार आल्याने कार चालक व दुचाकी चालकाचे गाडीवरील नियंत्रण सुटले. यामुळे दुचाकी व कारची समोरासमोर धडक झाली. जोरदार धडक बसल्याने दुचाकीवरील दोघेजण फेकले जाऊन यात त्यांचा मृत्यू झाला. 

तर कार चालक किरकोळ जखमी झाले आहेत. कार चालकास रुग्णालयात दाखल करण्यात आले आहे. घटनास्थळी सहाय्यक (Police) पोलिस निरीक्षक जालिंदर पळे व सहकाऱ्यांनी पंचनामा करून मृतदेह विच्छेदनासाठी पाठविला आहे. दरम्यान, अपघातानंतर घटनास्थळी प्रचंड गर्दी झाली होती. दरम्यान, घटनास्थळी सहाय्यक पोलिस निरीक्षक जालिंदर पळे, उपनिरीक्षक तडवी आणि सहकाऱ्यांनी वाहतूक सुरळीत केली.