जळगाव : अचानक वादळीवाऱ्यामुळे उभा कंटेनर उलटल्याची घटना चिंचोली शिवारात घडली. याच कंटेनरच्या आडोशाला जीव वाचविण्यासाठी उभे असलेले दोन जण जागीच ठार झाले. तर एक जण गंभीर जखमी झाला आहे. जळगाव (Jalgaon) तालुक्यातील चिंचोली गावाजवळील शासकीय वैद्यकीय महाविद्यालयाच्या (Jalgaon Medical Collage) बांधकाम ठिकाणी गुरूवारी (ता.२७) दुपारी ३ वाजेच्या सुमारास ही दुर्घटना घडली. मजुर भोला श्रीकुसूम पटेल (रा. सानीकावा जि. सिवान बिहार) आणि अभियंता चंद्रकांत वाभळे (वय-५२ रा.चाळीसगाव ह.मु. पुणे) असे मृतांचे नावे आहेत. (Live Marathi News)

जळगाव- औरंगाबाद महामार्गावरील चिंचोली गावाजवळ नवीन शासकीय वैद्यकीय महाविद्यालय इमारतीचे बांधकामाचे काम सुरू आहे. अनेक दिवस बंद असलेल्या या बांधकामावर गेल्या जानेवारीपासून कामाला सुरवात झाली आहे. या ठिकाणी कंपनी अंतर्गत काही बिहार राज्यातील मजूर दोन महिन्यांपासून कामावर आहेत. गुरुवारी (ता. २७) रोजी दुपारी ३ वाजेच्या सुमारास आलेल्या वादळापासून जीव वाचविण्यासाठी सैरावैरा धावत मजुरांनी सुरवातीला पत्र्याच्या शेडमध्ये आसरा घेतला. परंतु वादळाचा वेगापुढे पत्र्याचे शेड तग धरू शकले नाही. शेड उडून गेल्यावर मजूर मैदानात उभ्या कंटेनरच्या दिशेने जीव वाचविण्यासाठी धावले.

बचावासाठी आडोसा पण..

कंटेनरच्या बाजूला मजुरांनी आडोसा घेतला असतानाच वादळात उभे कंटेनर उलटले. यात भोला श्रीकुसूम पटेल (रा. सानीकावा जि. सिवान बिहार) आणि चंद्रकांत वाभळे (वय-५२ रा.चाळीसगाव ह.मु. पुणे) हे दोघे दाबले जाऊन त्यांचा जागीच मृत्यू झाला. सोबत असलेला अफरोज आलम (वय-२३ रा. कुंडाळे जि. पुरण्या बिहार) हा मजूर जखमी झाला. जखमीला तातडीने जळगावला जिल्हा शासकीय वैद्यकीय महाविद्यालयात दाखल करण्यात आले आहे.

क्रेन बोलावून काढले मृतदेह

कंटेनर उलटल्याची बातमी मिळाल्यावर एमआयडीसी पोलिसांना सुरवातीला अपघाताची शंका आली. मात्र, विस्तृत माहिती कळताच पोलिस पथकाने चिंचोलीच्या दिशेने धाव घेतली. कंटेनर खाली गाडले गेलेल्या दोघा मजुरांचा क्रेनच्या मदतीने कंटेनर उचलून मृतदेह बाहेर काढण्यात आला.