पातोंडा (जळगाव) : गडखांब गावाजवळ रविवारी दुपारी बसने दुचाकीला धडक दिल्याने गुगळवाळ (ता. मालेगाव) येथील तरुण प्रीतेश संजय निकम (वय २३) याचा जागीच मृत्यू (Death) झाला. (jalgaon news sister village is some distance away and accident death brother)

प्रीतेश हा पातोंडा येथे आपल्या बहिणीला भेटायला दुचाकीवर येत होता. गडखांब गावाजवळ इगतपुरी आगाराच्या चोपडा - नाशिक (Nashik) बसने (एमएच १४, बीटी ३६२९) पुढील बसला ओव्हरटेक करण्याच्या नादात दुचाकीला (एमएच ४१, सी ४१३५) जोरदार धडक (Accident) दिली. यात प्रीतेश निकम हा जागीच गतप्राण झाला. घटनेची माहिती मिळताच पोलिस कर्मचारी कपिल पाटील व सुनील पाटील यांनी घटनास्थळी जात पंचनामा केल्यानंतर मृतदेह विच्छेदनासाठी अमळनेर (Amalner) ग्रामीण रुग्णालयात पाठविला.

दोन बहिणींचा एकुलता भाऊ

प्रीतेश हा पातोंडा येथील भूषण एकनाथ बिरारी यांचा शालक असून, तो बहिणीला भेटायला येत असतानाच पातोंडा अवघे सहा किलोमीटर असतानाच काळाने घाला घातला. प्रीतेशच्या वडिलांचे मागील वर्षी अपघातात दुर्दैवी निधन झाल्याने आई व दोन बहिणींचा तो एकुलता एक आधार होता. गतवर्षी नवापूरजवळ झालेल्या अपघातात प्रीतेशच्या कुटुंबातील सहा सदस्य मृत झाले होते. आता पूर्ण कुटुंबात तो एकटा पुरूष सदस्य होता.

चालक पोलिसात हजर

चोपडा - नाशिक बसचा चालक संदीप हरिश्चचंद्र धनावटे (रा. देवळाली कॅम्प, नाशिक) अमळनेर पोलिस ठाण्यात स्वत:हून हजर झाला. पोलिस कर्मचारी कपिल पाटील व सुनील पाटील तपास करीत आहेत. दरम्यान, बसचालक समोरील बसला ओव्हरटेक करीत असताना अपघात झाल्याची चर्चा घटनास्थळी शेतात काम करणारे प्रत्यक्षदर्शी शेतकरी व शेतमजुरांमध्ये सुरू होती.