जळगाव : शहरातील तापमानाने पंचेचाळीशी ओलांडली आहे. शनिवारी जळगाव व भुसावळचे तापमान ४५.५ अंश असल्याची नोंद करण्यात आली आहे. आज देखील तेवढेच तापमान आहे. रात्री नऊपर्यंत उन्हाच्या झळा सुरू असल्याने वृध्दांसह सर्वांनाच उन्हाचा त्रास होत असल्याचे चित्र आहे. (jalgaon news High temperature in Jalgaon and Bhusawal)

आठवडाभरापासून सुर्य अधिक तापत असून आता जणू काही आगच ओकू लागला आहे. यामुळे वैशाखाचा वणवा आता पेटू लागल्‍याचा भास होत आहे. जळगाव (Jalgaon) शहराचे शनिवारचे तापमान ४४ अंशावर होते. आज त्यात दीड अंशानी वाढ झाली. सकाळी दहापासूनच उन्हाचे असह्य चटके बसत होते. उन्हाच्या असह्य झळांनी नागरिकांची चांगलीच होरपळ होताना दिसली.

महामार्गावरही सन्‍नाटा

जळगावात शनिवारचा बाजार असतो. यामुळे मार्केट परिसर, व्यापारी संकुलात वर्दळ असते. परंतु, उन्हामुळे वर्दळ नव्हती. रस्तावरील (Bhusawal) वाहतूक तुरळक सुरूच होती. मुख्‍य म्‍हणजे कायम रहदारी असलेल्‍या महामार्गावर देखील दुपारी शुकशुकाट पहायला मिळाला. मोठ्या वृक्षांजवळ दुचाकीधारक सावलीत गप्पा करीत होते. तर अनेकजण उन्‍हाची तिव्रता कमी झाल्‍यानंतर बाहेर पडलेले पाहण्यास मिळाले.

थंडपेयाची मागणी

डोक्यावर रुमाल, टोपी बांधूनही उन्हाचा चटक बसतच होता. गारवा मिळविण्यासाठी नागरिकांनी शितपेय, आईस्क्रीम, उसाचा रस, टरबूजाचा वापर केला. मात्र उन्हाची तीव्रता एवढी होती की काही केला गारवा मिळत नव्हता.