जळगाव : आमच्या पुढारी जातीला सर्व लोक शिव्या देतात. दुष्काळ पडला तरी शिव्या नाही पडला तरी शिव्या. आमचा तो धंदाच आहे. यामुळे ज्याला शिवी ऐकता येते त्याने आमदार व्हावं नाहीतर आमदार होऊ नये; असं वादग्रस्त वक्तव्य जळगाव जिल्ह्यातील अमळनेरमध्ये आयोजित एका कार्यक्रमात बोलताना एकनाथ शिंदेंच्या शिवसेनेचे नेते तथा मंत्री गुलाबराव यांनी केलं आहे. 

जळगाव जिल्ह्यातील अमळनेर येथील खानदेश शिक्षण मंडळाच्या कार्यक्रमाप्रसंगी मंत्री गुलाबराव पाटील यांनी सदरचे विधान केले आहे. तर राजकारणात काही विषय नाही; असे म्हणत व्यासपीठावर बसलेल्या मंत्री गिरीश महाजन यांच्याकडे बोट दाखवत हे तर कुणालाही पक्षात घेतात तुम्ही आहों, सब आहों..आमचं पण तेच. या शब्दात मंत्री गुलाबराव पाटील यांनी त्यांच्या नेहमीच्या अंदाजात भाषणातून जोरदार फटकेबाजी केली. विद्यार्थ्यांच्या होणाऱ्या आत्महत्या बद्दल सुद्धा मंत्री गुलाबराव पाटील यांना मत व्यक्त केले. 

आम्ही बदनामीचा विचार करत नाही 

आम्ही फक्त एवढाच विचार करतो की आम्ही लोकांच्या सेवे करता काम करतो. आम्ही पण कुठल्या गोष्टीचा विचार करत नाही. आम्ही सुद्धा संघर्षातून वर आलो आहोत. लोकांनी आम्हाला गद्दारच करून टाकले आहे. यामुळे आम्ही बदनामीचा विचार करत नसल्याचे देखील मंत्री गुलाबराव पाटील म्हणाले. तसेच विद्यार्थ्यांना उद्देशून एवढी मोठी शैक्षणिक संस्था आहे. यातून कोणी कलेक्टर व्हावा, फौजदार व्हावा, डॉक्टर व्हावा आणि नाही जमलं तर आमच्या धंद्यात या.

मेहनत करा आणि एकाग्र व्हा; मंत्री गिरीश महाजन 

शाळा आणि महाविद्यालयीन शिक्षण संपल्यापासून मी निवडणूक लढवत असून जिंकून येत आहे. सरपंच, राष्ट्रीय स्वयंसेवक संघाचा सदस्य झालो. अखिल भारतीय विद्यार्थी परिषद व भाजपमध्ये आलो आणि राजकारणामध्ये सतत ४० वर्ष नॉट आउट आहे. माझे वडील शिक्षक होते त्यांनाही वाटत होतं आपला पोरगा शिकला पाहिजे; पण माझं डोकं खेळामध्ये चाललं. मात्र राजकारणात मी एकाग्र राहिलो आणि आज राजकारणातला सगळा हुशार विद्यार्थी आहे की नाही. चाळीस वर्षे राजकारणातील निवडून येणं सोपं नाही. पहिल्यांदा मंत्री म्हणून काम करतो. त्यामुळे निवडून सुद्धा येतो मात्र सलग सात वेळा निवडून सोपं नाही. तुम्ही मेहनत करा तुमचं लक्ष जे आहे त्यावर एकाग्र व्हा यश तुम्हाला नक्की मिळतं.