जळगाव : टेलिग्रामवर आलेली लिंक लाईक करून फोटोंना लाईक करण्याचा टास्क स्वीकारणे डॉक्टरला महागात (Jalgaon) पडले आहे. हा टास्क देऊन पैसे गुंतवणुकीचे आमिष देऊन फसवणुकीचा प्रकार घडला आहे. यात जळगावच्या जिल्हा शासकीय वैद्यकीय रुग्णालयात (Jalgaon Medical Collage) कार्यरत डॉक्टराची १२ लाख ४२ हजारात ऑनलाइन फसवणूक झाली. (Maharashtra News)

उमरसरा (जि.यवतमाळ) येथील मूळ रहिवासी असलेले डॉ. प्रणव परशुराम सामृतवार हे जळगावच्या शासकीय वैद्यकीय महाविद्यालयात कार्यरत आहेत. ते महाविद्यालयाच्या परिसरात शासकीय निवासस्थानात वास्तव्यास आहेत. ९ ते २४ नोव्हेंबरदरम्यान त्यांना टेलीग्रामवर एक लिंक आली. त्यांनी ती लिंक ओपन केल्यानंतर (Online Fraud) त्यांना टास्क देण्यात आला. त्यानंतर ऑनलाइन सक्रिय सायबर गुन्हेगारांनी या लिंकद्वारे डॉ. सामृतवार यांच्याशी संपर्क करून त्यांना पाठवलेल्या (Cyber Crime) लिंकवरील फोटोला लाईक करण्याचा टास्क दिला. त्यामध्ये पैसे गुंतवणूक करून सुरुवातीला त्यांना ९ हजार १५० रुपये देऊन त्यांचा विश्वास संपादन केला.

('साम टीव्ही'चं व्हॉट्सअँप चॅनल जॉईन करण्यासाठी येथे क्लिक करा)

सुरवातीला पैसे मिळाल्याने सायबर गुन्हेगारांनी सांगितल्याप्रमाणे डॉक्टरांनी पैसे गुंतविले. त्यानुसार १२ लाख ४२ हजारांची गुंतवणूक केली. परंतु गुंतवणुकीचा परतावा मिळाला नाही. उलट अधिक पैसे द्यावे लागत असल्याचे निदर्शनास आल्यावर फसवणूक होत असल्याचे कळताच डॉ. प्रवण यांनी सायबर पोलिसांत जात तक्रार दिली. सायबर पोलीस ठाण्यात गुन्हा दाखल करण्यात आला.