जळगाव : मित्राचा वाढदिवस असल्याने त्याचा वाढदिवस सेलिब्रेट करण्याचे नियोजन मित्रांनी मिळून ठरविले. रात्री केक कापून वाढदिवस साजरा करण्यासाठी केक घेण्यासाठी दुचाकीने जात असताना घाट झाला. केक घेण्यापूर्वीच अपघात होऊन मुलाचा मृत्यू झाल्याची घटना धरणगाव तालुक्यातील गारखेडा रस्त्यावर घडली. तर सोबतचे मित्र जखमी झाले आहेत. 

धरणगाव तालुक्यातील गारखेडा येथील प्रथमेश सुधाकर पाटील (वय १५) असे अपघातात मृत झालेल्या मुलाचे नाव आहे. सदर अपघात १६ डिसेम्बरला सायंकाळी सातला दोन दुचाकीची समोरासमोर धडक होऊन अपघात झाला होता. यात प्रथमेश याचा उपचारादरम्यान मृत्यू झाला. एकुलत्या एक मुलाच्या मृत्यू झाल्याने आई-वडिलांनी एकच आक्रोश केला. तर मित्राच्या वाढदिवसाचा केक आणायला गेला अन्‌ कायमचा निघून गेला म्हणून त्याची मित्रमंडळीही हुंदके देत रडत होते. 

समोरून येणाऱ्या दुचाकीला धडक  
गारखेडा (ता. धरणगाव) प्रथमेश पाटील हा आपल्या आई- वडिलासंह गावात वास्तव्याला होता. मित्राचा वाढदिवस असल्याने प्रथमेश हा वैभव विठ्ठल देशमुख, हितेश भगवान भोई, शिवराज पंकज पाटील असे सोबत शिकणारे चौघे मित्र धरणगाव येथे केक घेण्यासाठी सायंकाळी सातला दुचाकीने धरणगावकडे निघाले होते. दरम्यान धरणगाव ते गारखेडा रस्त्यावरून जात असताना समोरून येणारी दुचाकी यांची समोरासमोर जोरदार धडक झाली.

सहाजण झाले जखमी 
दुचाकींच्या धडकेमुळे झालेल्या अपघातात प्रथमेशसह त्यांचे चौघे मित्र आणि समोरील दुचाकीवरील शेखर महाजन तसेच गायत्री महाजन हे भाऊ- बहीण जखमी झाले. यातील प्रथमेश पाटील हा गंभीर जखमी झाल्याने त्याला जळगाव येथील रुग्णालयात दाखल केले असता त्याचा उपचारादरम्यान मृत्यू झाला. एकुलत्या एक मुलाचा मृत्यू झाल्याने नातेवाईकांनी एकच आक्रोश केला. प्रथमेशचा अपघातात मृत्यू झाल्याचे कळताच मित्रमंडळींनीही धाव घेत रुग्णालयात गर्दी केली होती.