जळगाव : जळगाव शहरासह जिल्ह्यात गुन्हेगारी वाढत चालली असून मागील काही दिवसात सातत्याने खुनाच्या घटना घडत आहेत. अशात पहाटेच्या सुमारास एका तरुणाला भर रस्त्यात गाठून त्याच्यावर हल्ला करत हत्या करण्यात आल्याची घटना घडली आहे. या घटनेने शहरात खळबळ उडाली असून पोलिसांकडून तपास सुरु करण्यात आला आहे. 

जळगाव शहरातील रामेश्वर कॉलनी येथील विशाल रमेश मोची (वय २६) असे घटनेत मृत झालेल्या तरुणाचे नाव आहे. आज पहाटे तीन वाजेच्या सुमारास बेंडाळे चौकातील महावितरण कार्यालाजवळ हि थरारक घटना घडली आहे. हत्येची घटना घडल्याने कायदा व सुव्यवस्थेचा प्रश्न ऐरणीवर आला आहे. पहाटेच्या सुमारास घडलेल्या या घटनेमुळे परिसरात एकच खळबळ उडाली असून वाढत्या गुन्हेगारीला चाप बसावा अशी मागणी होत आहे.   

धारदार शस्त्राने केला हल्ला 

दरम्यान विशाल मोची हा पहाटे तीन वाजेच्या सुमारास बेंडाळे चौक परिसरात गेलेला असताना त्याच्यावर ६ ते ७ अज्ञात हल्लेखोरांनी अचानक हल्ला चढवला. काही समजण्याच्या आत धारदार शस्त्रांने वार केल्याने विशाल हा जागीच कोसळला. यात त्याचा मृत्यू झाला. यानंतर हल्लेखोर घटनास्थळावरून फरार झाले होते. घटनेची माहिती पोलिसांना देण्यात आली.  

पोलिसांकडून तपास सुरु 

घटनेची माहिती मिळताच जिल्हापेठ पोलिसांनी तात्काळ घटनास्थळी धाव घेतली. पोलिसांनी मृतदेह ताब्यात घेऊन शवविच्छेदनासाठी रुग्णालयात पाठवला आहे. मात्र विशालची हत्या नेमक्या कुठल्या कारणामुळे झाली, याचा शोध पोलीस सध्या घेत असून हल्लेखोरांचा देखील तपास केला जात आहे. दरम्यान विशालच्या पश्चात आई- वडील, लहान भाऊ आणि विवाहित बहीण असा परिवार आहे.