अमळनेर (जळगाव) : काम आटोपून रात्रीच्या सुमारास घरी जात असताना मोटारसायकलचा अपघात झाला. मोटारसायकल घसरल्याने झालेल्या अपघातात डोक्याला मार लागल्याने वृद्धाचा मृत्यू झाल्याची घटना रात्री घडली आहे. ही घटना अमळनेर तालुक्यातील मंगरूळ शिवारात सोमवारी (ता. ६) रात्री घडली. घटनेची माहिती मिळाल्यानंतर कुटुंबीयांची एकच आक्रोश केला. 

चाळीसगाव तालुक्यातील भामरे येथील संतोष चिंतामण चंदासरे (वय ६०) असे अपघातात मृत झालेल्या वृद्धांचे नाव आहे. संतोष चंदासरे हे कामानिमित्त अमळनेर शहरात आले होते. काम आटोपल्यानंतर ते दुचाकीवरून गावी परत जाण्यासाठी निघाले होते. दरम्यान अमळनेर- चाळीसगाव मार्गावर मंगरूळजवळ दुचाकी घसरली. यात संतोष चंदासरे हे जबर जखमी झाले. चंदासरे यांच्या डोक्याला मार लागला होता. 

मदत मिळण्यास उशीर 

दरम्यान रात्रीची वेळ असल्याने या मार्गावरून रहदारी नव्हती. यामुळे अपघात झाल्यानंतर साधारण अर्धा तास ते रस्त्यावर जखमी अवस्थेत पडून होते. काही वेळानंतर अपघात झाल्याचे लक्षात आल्याने हॉटेल चालकांसह काही नागरिकांनी त्यांना उचलून ग्रामीण रुग्णालयात दाखल केले. ग्रामीण रुग्णालयात त्यांचा मृत्यू झाला. घटनेचे वृत्त कळताच चंदासरे यांच्या कुटुंबीयांनी रुग्णालयात धाव घेत आक्रोश केला. 

दुचाकीच्या धडकेत एक जण जखमी
जळगाव : कामावर पायी जात असलेले कादर हिलाल पटेल (वय ४३) यांना दुचाकीने धडक दिल्यामुळे ते जखमी झाले. ही घटना आर. एल. चौफुली ते फातेमा नगर दरम्यान घडली. याप्रकरणी एमआयडीसी पोलिसात दुचाकीस्वाराविरुद्ध गुन्हा दाखल करण्यात आला आहे. पोलिस कर्मचारी सचिन पाटील तपास करीत आहेत.