नागपूरमधून एक धक्कादायक बातमी समोर येत आहे. नंदुरबारमधील उपविभागीय पोलीस अधिकारी म्हणून कार्यरत असलेल्या आयपीएस अधिकाऱ्यावर लग्नाचे आमिष दाखवून लैंगिक अत्याचार केल्याचा आरोप आहे. एका महिला डॉक्टरने हे गंभीर आरोप केले असून, आयपीएस अधिकाऱ्याविरोधात नागपूरमधील इमामवाडा पोलीस ठाण्यात अत्याचार आणि अॅट्रॉसिटी कायद्यांतर्गत गुन्हा दाखल करण्यात आला आहे. या धक्कादायक प्रकरणानंतर परिसरात खळबळ उडाली आहे.

दर्शन दुगडे असे आयपीएस अधिकाऱ्याचे नाव आहे. महिलेने इमामवाडा पोलीस ठाण्यात दाखल केलेल्या तक्रारीनुसार, सुरूवातीला पीडित महिला डॉक्टर आणि आयपीएस दर्शन दुगडे यांची ओळख एमबीबीएस शिक्षण घेत असताना इंस्टाग्रामच्या माध्यमातून झाली होती. दोघांमध्ये मैत्री झाली. मैत्रीचं रूपांतर प्रेमात झालं. त्यानंतर ओळखीचा फायदा घेत दर्शन यांनी तिला लग्नाचे आमिष दाखवले.

महिलेला प्रेमाच्या जाळ्यात ओढून तिला हॉटेलमध्ये नेत तिच्यावर लैंगिक अत्याचार केला. असा गंभीर आरोप पीडित महिलेने आपल्या तक्रारीत म्हटलं आहे. त्यानंतर महिलेने दर्शनला लग्नासाठी मागणी घातली. तेव्हा त्यांनी लग्नास नकार दिला, असं महिलेने आपल्या तक्रारीत म्हटलं आहे. त्यानंतर पीडित महिलेने पोलीस ठाण्यात धाव घेतली. तसेच आयपीएस अधिकारी दर्शन दुगड यांच्यावर गुन्हा दाखल केला आहे.

इमामवाडा पोलीस ठाण्यात आरोपीविरोधात गुन्हा दाखल झाल्यानंतर पोलिसांनी चौकशीला सुरूवात केली. तसेच तक्रारीवरून पोलिसांनी अत्याचार आणि अॅट्रॉसिटी कायद्यांतर्गत गुन्हा दाखल केला. तसेच पोलिसांनी या प्रकरणाच्या चौकशीला सुरूवात केली आहे. या धक्कादायक घटनेची माहिती परिसरात पसरल्यानंतर लोकांमध्ये खळबळ उडाली आहे.