देशातील २०२९च्या लोकसभा निवडणुकांआधी राजकारणात मोठे बदल होणार आहेत. त्या बदलांमुळे राजकारणाचा चेहरामोहरा बदलून जाणार आहे. २०२९ च्या निवडणुकीत मतदारसंघाची पुनर्रचना होणार आहे. या मतदारसंघ पुनर्रचनेत जिल्ह्यात लोकसभा आणि विधानसभांच्या जागा वाढण्याची शक्यता आहे. जागा वाढण्याची आणि महिला आरक्षण लागणार असल्याची भनक लागताच भाजप कामाला लागली आहे. सांगलीचे पालकमंत्री चंद्रकांत पाटील यांनी भाजपच्या स्थापना दिनानिमित्त कार्यकर्ता मेळाव्यात कार्यकर्त्यांना कामाला लागण्याच्या सुचना दिल्या आहेत.

या मेळाव्याला माजी मंत्री अण्णासाहेब डांगे, आमदार गोपीचंद पडळकर, प्रदेश उपाध्यक्ष शेखर इनामदार, शहर जिल्हाध्यक्ष प्रकाश ढंग, ग्रामीण जिल्हाध्यक्ष सम्राट महाडिक, भगवानराव साळुंखे, संग्रामसिंह देशमुख, डॉ. रविंद्र आरळी, रावसाहेब पाटील, दीपक शिंदे, राहुल महाडिक, शरद लाड आदी उपस्थित होते. मेळाव्यात बोलताना चंद्रकांत पाटील म्हणाले, मतदारसंघांची पुनर्रचना होणार आहे.

या पुनर्रचनेत विधानसभेच्या २८८ ऐवजी सुमारे ३५० मतदारसंघ तर लोकसभेत ५४४ ऐवजी ६५० खासदारांची संख्या होईल. मतदारसंघ पुनर्रचनेत सांगली जिल्ह्यात लोकसभेचे दोन मतदारसंघ असतील, तर विधानसभेचे ८ ऐवजी ९मतदार संघ होतील. कार्यकर्त्यांनी मतदारसंघ पुनर्रचना, मतदार यादी पुनरीक्षण आणि महिला आरक्षणावर बारकाईने काम करावे. बीएलओ घरी येतील त्यांना अर्ज भरून द्या. नाहीतर २०२९ मध्ये होणाऱ्या निवडणुकीत मतदान करता येणार नाही, असं पाटील म्हणाले.

दरम्यान राज्यातील खासदारांचे संख्याबळ ४८ आहे त्यात वाढ केली जाणार आहे. राज्यातील खासदारांची संख्या २४ ने वाढणार आहे. महिलांसाठी ३३ टक्के आरक्षण लागू झाल्यावर २७३ जागा महिलांसाठी राखीव होतील. तेवढ्या जागांचे संख्याबळ वाढविण्याची मोदी सरकारची योजना आहे. दोन आठवड्यांपूर्वी गृहमंत्री अमित शहा यांनी विविध राजकीय पक्षांच्या नेत्यांशी चर्चा करीत सहमती घडवून आणण्याचा प्रयत्न केला आहे.