सचिन कदम, साम टीव्ही

भारत-पाकिस्तानमध्ये युद्धजन्य परिस्थिती निर्माण झालेली असताना रायगडच्या पेणमधून एक मोठी बातमी समोर येत आहे. तरूणाला सोशल मीडियावर आक्षेपार्ह पोस्ट केल्याप्रकरणी अटक करण्यत आली आहे. त्या तरूणाने सोशल मीडियावर पाकिस्तानचे समर्थन करणारे पोस्ट शेअर केले होते. ही पोस्ट व्हायरल होताच अनेकांनी निषेध करत तरूणाविरोधात पोलिसांकडे तक्रार दाखल केली.

मोसिन मुजावर असे तरूणाचे नाव आहे. तो रायगडच्या पेणमधील रहिवासी असल्याची माहिती समोर आली आहे. एकीकडे भारत पाकिस्तानमधील वाद शिगेला पोहोचलेला असताना, पेणच्या तरूणाने सोशल मीडियावर पाकिस्तानचे समर्थन दर्शवणारी पोस्ट शेअर केली. पोस्ट शेअर केल्यानंतर परिसरातील नागरिकांना संताप अनावर झाला.

नागरिकांनी तातडीने तरूणाविरोधात पोलीस ठाण्यात तक्रार दाखल केली. या प्रकरणी पेण पोलिसांनी गुन्हा दाखल केला असून, स्थानिक नागरिक आणि सर्वपक्षीय कार्यकर्त्यांनी एकत्र येत मोर्चा काढला आणि निषेध व्यक्त केला.

भारत माता की जय, वंदे मातरमच्या घोषणांनी परिसर दुमदुमून गेला, तर पाकिस्तानच्या राष्ट्रध्वजाचे पोस्टर पायदळी तुडवून जोरदार घोषणाबाजी करण्यात आली. या घटनेनंतर परिसरात खळबळ उडाली.