बंगालच्या उपसागरात खवळलेलं दितवाह वादळ आज उत्तर तमिळनाडू-दक्षिण किनारपट्टी आंध्र प्रदेशात धडकणार असल्याचं हवामान विभागाने म्हटलं आहे. याचा परिणाम भारतात होणार आहे. महाराष्ट्रात या चक्रीवादळामुळे वातावरणात मोठा बदल पाहयला मिळतो आहे. गेल्या काही दिवसांपासून राज्यात वातावरण ढगाळ असल्याकारणाने उकाडा वाढला होता. मात्र आज पासून पुन्हा तापमानाचा पारा घसरला असून कडाक्याची थंडी जाणवू लागली आहे.

राज्यात मुंबई, पुणे, जळगाव, निफाड, नाशिक, नागपूर, सोलापूर या ठिकाणी काही अंशी तापमानाचा पारा घसरला आहे. त्यामुळे जिल्ह्यांमध्ये गुलाबी थंडीची चादर पसरली आहे. काल म्हणजेच शनिवारी विदर्भातील भंडारा येथे राज्याचे नीचांकी १० अंश तापमान नोंदले गेले. राज्यात बहुतांश ठिकाणी तापमान १० अंशांच्या खाली असून, किमान तापमानात घसरण झाल्याने थंडी कमी झाली आहे.

भारतीय हवामान विभागाच्या अंदाजानुसार, दितवा चक्रीवादळ (Ditwah Cyclone) भारतीय किनाऱ्याकडे सरकत असल्याने तामिळनाडू, आंध्र प्रदेश आणि पुद्दुचेरीमध्ये आणखी मुसळधार पाऊस पडण्याची शक्यता आहे. हवामान विभागाने या प्रदेशांसाठी रेड अलर्ट देखील जारी केला आहे.

राज्याचे महसूल आणि आपत्ती व्यवस्थापन मंत्री केकेएसएसआर रामचंद्रन म्हणाले की, चक्रीवादळ चेन्नईजवळील किनाऱ्यावर धडकेल की नाही हे अद्याप स्पष्ट झालेले नाही, परंतु राज्य सरकार युद्धपातळीवर बचाव आणि मदत कार्य सुरू करण्यास पूर्णपणे सज्ज आहे.आयएमडीचे महासंचालक डॉ. मृत्युंजय महापात्रा म्हणाले की, चक्रीवादळाच्या प्रभावामुळे, तामिळनाडू आणि पुद्दुचेरीभोवती समुद्री वारे ताशी ७० ते ८० किलोमीटर वेगाने वाहत आहेत, जे आता ९० किमी/ताशी वेगाने वाहत आहेत. तसेच या चक्रीवादळाचे परिणाम आज संध्याकाळ पर्यंत जाणवतील.