Maharashtra : महाराष्ट्र-छत्तीसगड सीमेजवळ पोलिसांची मोठी कामगिरी; ८९ लाख बक्षीस असलेले ११ नक्षलवादी सरेंडर

महाराष्ट्र -छत्तीसगड राज्याच्या सीमेवर मोठ्या प्रमाणात नक्षली कारवाया घडवून आणणाच्या नक्षलवाद्यांच्या चळवळीला मोठा हादरा बसला आहे. पोलिसांनी आज केलेल्या मोठ्या कारवाईत दरेकसा दलमच्या ११ नक्षल्यांनी गोंदिया पोलिसांसमोर आत्मसमर्पण केले आहे. परिणामी, गोदिया जिल्ह्यातून दरेकसा दलम जवळजवळ संपल्यात जमा झाल्याचे बोलले जात आहे.

महाराष्ट्र -छत्तीसगड राज्याच्या सीमेवर आज गोंदिया पोलिसांनी मोठी कारवाई करत ११ नक्षलवादीयांनी स्वतःहून आत्मसमर्पण केले आहे. ही मोठी कारवाई गडचिराली परिक्षेत्राचे पोलिस उपमहानिरीक्षक अंकुश गोयल, गोंदियाचे पोलिस अधीक्षक गोरख भामरे. तसेच देवरीचे अप्पर पोलिस अधीक्षक अभय डोंगरे, उपविभागीय पोलिस अधिकारी यांच्या नेतृत्वाखाली करण्यात आली आहे.

आत्मसमर्पण करणाऱ्या नक्षलवाद्यांपैकी २५ लाखाचे बक्षिस असलेला दरेकसा दलम प्रमुख विकास नागपूरे याचा समावेश आहे. विकास नागपूरे हा अनंत नावाने दलम मध्ये सक्रीय होता. अनंत हा नक्षल्यांचे पत्रव्यवहार करीत असे. आत्मसमर्पण करणाऱ्या ११ नक्षलवाद्यांपैकी ७ जणांजवळ हत्यार सापडली.

सापडलेल्या हत्यारांमध्ये ३ आधुनिक हत्यारे असल्याचे सांगण्यात आले. पोलिसांना या कारवाईत मोठे येश मिळाले असून दरेकसा दलमचे अस्तित्व जवळपास संपुष्टात आले आहे. आता केवळ बोटावर मोजण्याएवढे २ ते ३ नक्षलवादी सदस्य या ठिकाणी शिल्लक असल्याची शक्यता पोलिसांकडून वर्तवण्यात आली आहे.