Crime : पुण्यात वेश्या व्यवसाय आणि गांजा विक्री सर्रास सुरू, गुन्हेगारांना संरक्षण कवच कोणाचं?

सागर आव्हाड, पुणे

पुणे शहरांमध्ये अवैध धंदे मोठ्या प्रमाणावरती सुरू आहेत. पोलीस आयुक्तांनी आदेश देऊनही हे धंदे थांबता थांबत नाहीत. आठवड्यातील शनिवार रविवार हे धंदे मोठ्या प्रमाणावर सुरू असतात. स्पामध्ये वेश्या व्यवसाय, गांजा एमडी राजरोसपणे विकणे यामुळे शहरातील भाईगिरी वाढली असून कोयता घेऊन हल्ला करण्याच्या घटना सर्रास घडत आहेत. मात्र या सगळ्या गुन्हेगारांना कोणाचं संरक्षण कवच आहे? असा संतप्त सवाल नागरिकांकडून उपस्थित केला जात आहे.

येरवडा परिसरातील अमली पदार्थ, अवैध दारू, वेश्याव्यवसाय आणि गुन्हेगारीचे जाळे दिवसेंदिवस वाढत असून त्यांना पोलीस यंत्रणेतील काही मंडळींकडून छुपे संरक्षण मिळत असल्याचे धक्कादायक आरोप नागरिकांकडून समोर येत आहेत. लक्ष्मी नगर, यशवंत नगर, गाडीतळ रोड, कल्याणी नगर परिसरात खुलेपणाने गांजा विक्रीचा व्हिडिओ व्हायरल झाला आहे.

व्हायरल झालेल्या व्हिडिओमध्ये एका वयस्कर अपंग व्यक्तीकडून ५० ग्रॅम गांजा थेट २०० रुपयांत विकला जात असल्याचे दिसून येते. स्थानिक पोलिसांपेक्षा नार्कोटिक्स विभागाच्या कारवाया अधिक असल्याची तीव्र नाराजी लोकांमध्ये आहे. नार्कोटिक्स विभागाने अनेक ठिकाणहून विमल गुटखा प्रकरणात तब्बल २० लाखांचा मुद्देमाल जप्त केला.

कल्याणी नगर परिसरात वेश्याव्यवसायाच्या नावाखाली चालणारे मसाज पार्लरदेखील खुलेआम सुरू असून, संबंधित अधिकारी त्याकडे जाणीवपूर्वक दुर्लक्ष करीत असल्याचे आरोप आहेत. पुणे पोलीस आयुक्तांकडून अवैध धंद्याविरोधात कारवाई केली जाते, असं बोललं जातं मात्र राजरोसपणे पुणे शहरातील अनेक भागात अवैध धंदे जोरात सुरू आहेत. त्यामुळेच भाईगिरी वाढली आहे. पोलीस आयुक्त इकडेही लक्ष द्या, असा नागरिकांनी म्हटलं आहे.