रत्नागिरी, ता. ६ सप्टेंबर २०२४

Ramdas Kadam On Uddhav Thackeray: विधानसभा निवडणुकांआधी महायुतीमध्ये जोरदार घमासान पाहायला मिळत आहे. गेल्या काही दिवसांपासून शिवसेना शिंदे गटाचे नेते रामदास कदम यांनी भारतीय जनता पक्षावर निशाणा साधत टीकेची झोड उठवली होती. रामदास कदम यांच्या या भूमिकेने सेना- भाजपमधील नेत्यांमध्ये जोरदार घमासान पाहायला मिळाले होते. मात्र आता अचानक रामदास कदम यांनी नरमाईची भूमिका घेतल्याचे दिसत असून विधानसभेला एकत्र लढणार असल्याचे म्हटले आहे. तसेच उद्धव ठाकरेंबाबतही एक मोठा गौप्यस्फोट केला आहे.

रामदास कदम नरमले..

भाजपच्या विरोधात टीकेची झोड उठवल्यानंतर शिवसेनेचे नेते रामदास कदम यांनी अचानक नरमाईची भूमिका घेतली आहे. विधानसभा निवडणुकीत आम्हाला सर्वांना सोबत घेऊन जायचं आहे. आम्हाला महायुती टिकवायची आहे, जो चुकला त्याला सोबत घेऊन जायचं आहे, शिवसेनाप्रमुख बाळासाहेब ठाकरे यांना अभिप्रेत असलेला विकास हेच आमचे ध्येय आहे. मुख्यमंत्री एकनाथ शिंदे यांनी रामदास कदमचे स्वप्न पुर्ण केले, त्यासाठी त्यांचे धन्यवाद असे रामदास कदम यांनी म्हटले आहे.

उद्धव ठाकरेंबाबत मोठा गौप्यस्फोट

"उध्दव ठाकरेंनी वडिलांच्या विचाराशी गद्दारी केली, असा पुनरुच्चार करत आमदार गुवाहाटीला गेल्यावर उद्धव ठाकरे यांनी मला फोन केला होता, असा मोठा दावाही रामदास कदम यांनी केला. तसेच अजून वेळ गेली नाही. तुम्ही काँग्रेस सोडतोय अशी पत्रकार परिषद घ्या, मी गुवाहाटीमधून सर्व आमदारांना दोन तासात परत आणतो असे मी म्हणालो होतो, पण उद्धव ठाकरेंनी शरद पवारांचे ऐकले," असा खळबळजनक गौप्यस्फोटही कदम यांनी यावेळी केला.

पुस्तकही लिहणार..

"उद्या गणपती बसणार आहेत. मी शपथ घेऊन सांगतो असे म्हणत ५० खोक्यांचा विषय येतो कुठे? गद्दारी कोणी केली? गद्दारीची व्याख्या काय आहे," असा सवाल रामदास कदम यांनी उपस्थित केला. तसेच शिवसेना का सोडली यावर मी पुस्तकही लिहणार आहे. असेही रामदास कदम यावेळी म्हणाले. दरम्यान, रामदास कदम यांच्या या दाव्यावरुन आता शिंदे गट अन् ठाकरे गटामध्ये पुन्हा वाद रंगण्याची शक्यता आहे.