रणजित माजगावकर, कोल्हापूर

कोल्हापूर जिल्ह्यात बनावट HSRP नंबर प्लेट तयार करणाऱ्या कारखान्यावर पोलिसांनी मोठी कारवाई केली आहे. हातकणंगले तालुक्यातील साजणी गावात सुरू असलेल्या या अवैध कारखान्यावर स्थानिक गुन्हे अन्वेषण शाखेने छापा टाकत तब्बल ४ लाख ६ हजार रुपयांचा मुद्देमाल जप्त केला आहे.

वाहनांवर बसवण्यात येणाऱ्या हाय सिक्युरिटी रजिस्ट्रेशन प्लेट अर्थात HSRP नंबर प्लेटची बनावट निर्मिती सुरू असल्याची माहिती पोलिसांना मिळाली होती. त्यानुसार स्थानिक गुन्हे अन्वेषण शाखेच्या पथकाने साजणी गावात छापा टाकला. या कारवाईत नंबर प्लेट तयार करण्यासाठी वापरली जाणारी दोन मशीन, तयार व अर्धवट तयार नंबर प्लेट्स तसेच अन्य साहित्य असा एकूण ४ लाख ६ हजार रुपयांचा मुद्देमाल जप्त करण्यात आला आहे.

या प्रकरणी ३१ वर्षीय संतोष बबन यादव याला पोलिसांनी अटक केली असून त्याच्या विरोधात हातकणंगले पोलीस ठाण्यात गुन्हा दाखल करण्यात आला आहे. बनावट नंबर प्लेटच्या माध्यमातून गुन्हेगारी कृत्यांना चालना मिळू शकते, त्यामुळे ही कारवाई महत्त्वाची मानली जात आहे.

पोलिसांकडून या रॅकेटमागील इतर संबंधितांचा शोध सुरू आहे.बनावट HSRP नंबर प्लेट तयार करणाऱ्यांविरोधात पोलिसांनी कडक कारवाईचा इशारा दिला असून वाहनधारकांनी अधिकृत केंद्रातूनच नंबर प्लेट बसवून घ्याव्यात, असे आवाहन करण्यात आले आहे.