Bhandara: देशभरात सर्वत्र होळीचा सण मोठ्या उत्साहात साजरा होत आहे. देशभरात विविध प्रदेशात होळी साजरी करण्याच्या पद्धती देखील विविध आहेत. मात्र सध्या भंडारा जिल्ह्यातील अनोख्या होळीची सर्वत्र चर्चा होत आहे. भंडारा शहरातील लाल बहादुर शास्त्री शाळेने शिव्यांकडून ओव्यांकडे हा उपक्रम राबवत विद्यार्थ्यांनी ६०० शिव्यांची होळी पेटवली. काय आहे हा उपक्रम चला जाणून घेवू. (Latest Marathi News)

देशभरात सर्वत्र होळीचा उत्साह पाहायला मिळत आहे. याच निमित्ताने भंडारा (Bhandara) शहरातील लाल बहादूर शास्त्री विद्यालयाच्या मराठी भाषा समितीने एका आगळ्या वेगळ्या उपक्रमाचे आयोजन केले होते. मुलांच्या बोलण्यात कायम येणारे शब्द,अर्थही माहित नसलेली शिवराळ भाषा, यावर उपाययोजना म्हणून समूपदेशनासाठी शिव्यांकडून ओव्यांकडे या स्पर्धेचे आयोजन केले गेले. यामध्ये माहित असलेल्या, ऐकलेल्या, प्राणी, पक्षी,शरीरयष्टी, वर्ण, रंगरुप, आई, बहिणींना उद्देशून दिल्या जाणा-या अश्लील शिव्या चक्क मुलांकडून संकलित केल्या गेल्या. (Holi Celibration 2023)

या उपक्रमात तब्बल ६०० शिव्या जमा झाल्या. संकलित झालेल्या शिव्यांचे कागद होलीकामातेस समर्पित करण्यात आले. यासह सर्वांनी पुन्हा शिव्या देणार नाही, वाईट बोलणार नाही अशा आशयाची शपथ पण घेतली. दरम्यान, "मुलांना सुसंस्कारित करुन शिक्षण प्रवाहात पुढे नेण्यासाठी योग्य दिशा ठरवणे गरजेचे असते. मुलांच्या शिवराळ भाषेवर विधायक मार्गानेच प्रयत्न करावेत या उद्देशाने शिव्यांकडून ओव्यांकडे या उपक्रमाचे आयोजन केले" असे प्रतिपादन शाळा प्रशासनाने केले आहे. या उपक्रमाची सध्या सर्वत्र चर्चा होताना दिसत आहे.